ސިވިލް ކޯޓުން އެލައިޑްގެ މައްޗަށް މި ހުކުމް ކޮށްފައިވަނީ ޖުލައި 19 ވަނަ ދުވަހު އެވެ. އަދި ހުކުމް ކޮށްފައިވަނީ، ހުކުމް ކުރާ ދުވަހުން ފެށިގެން ހަ މަސް ދުވަހުގެ ތެރޭގައި ދައްކައި ހަލާސް ކުރަން ޖެހޭ ގޮތަށެވެ.
އެހެން ނަމަވެސް ސިވިލް ކޯޓުގެ ހުކުމާއި އެއްގޮތަށް އެލައިޑުން ފުރަތަމަ ޕޭމަންޓުގެ ގޮތުގައި ދޭންޖެހޭ 3.8 މިލިއަން ޑޮލަރު ދީފައިނުވާތީ ޔޮޓް ޓުއާސްއިން ވަނީ ހުކުމް ތަންފީޒު ކުރުމުގެ އަމުރެއް ނެރެދިނުމަށް އެދި ސިވިލް ކޯޓުގައި އެދިފަ އެވެ.
މި މައްސަލައާ ގުޅިގެން އެލައިޑުން ވަނީ ސިވިލް ކޯޓުގެ ހުކުމް ތަންފީޒު ކުރުން ފަސްކުރުމުގެ އަމުރަކަށް އެދި ހައިކޯޓަށް ހުށަހަޅާފަ އެވެ. އެގޮތުން އެލައިޑުން ހުކުމް ތަންފީޒު ކުރުން ފަސްކުރުމުގެ އަމުރަކަށް އެދެމުން ބުނެފައިވަނީ، އެ އަމުރު ނެރެނުދީފި ނަމަ އެލައިޑުގެ ވިޔަފާރިއަށް ވަރަށް ބޮޑު އަސަރެއްކޮށް، އިއާދަ ނުކުރެވޭ ވަރުގެ ބޮޑު ގެއްލުމެއް ވެދާނެ ކަމަށެވެ.
އެ މައްސަލައިގައި ހައިކޯޓުން މިއަދު ނެރުނު އަމުރުގައި ބުނެފައިވަނީ އެކޯޓުން އެ މައްސަލައިގައި ވަކި ގޮތެއް ކަނޑައަޅަންދެން ނުވަތަ އެ މައްސަލަ ބަލާ ނިމެންދެން ހުކުމް ތަންފީޒު ކުރުމުގެ ގޮތުން އެއްވެސް ފިޔަވަޅެއް ނޭޅުމަށެވެ.
