އިދިކޮޅު ޕީޕީއެމް، ޕީއެންސީ ކޯލިޝަނުން ޕާޓީގެ މެމްބަރުންނަށް ލޯޔަލްޓީ ކާޑު ތައާރަފް ކުރުމަށް ބޭއްވި ރަސްމިއްޔާތުގައި، ރައީސް ޔާމީންގެ ސަރުކާރުގެ އިކޮނިމިކް މިނިސްޓަރުކަންވެސް ކުރައްވާފައިވާ ސައީދު ވިދާޅުވީ، ސިޔާސީ ޕާޓީއަކުން ކުރާނޭ އެންމެ ޒަމާނީ މަސައްކަތް ކުރަމުން އަންނަނީ އިދިކޮޅު ކޯލިޝަނުން ކަމަށެވެ.
މީގެ އިތުރުން ސައީދު ވިދާޅުވީ ބްރިޖާއި ދަރުމަވަންތަ ހޮސްޕިޓަލް ފެނުމުން ހަނދާންވަނީ ރައީސް ޔާމީންގެ މަތިން ކަމަށެވެ.
ސައީދު ވިދާޅުވީ ތަރައްގީގެ އުންމީދުތައް ރައީސް ޔާމީން މަތިކޮށްދީފައިވާ ކަމަށެވެ. އެހެންކަމުން ޓީޝާޓެއްގައި ދަރުމަވަންތަ ހޮސްޕިޓަލް ނުވަތަ ރައީސް ޔާމީންގެ ތަރައްގީގެ މަންޒަރުތައް ފެންނާނެގޮތަށް ޖެހުމަށް ޕީޕީއެމް ޕީއެންސީގެ ސަޕޯޓަރުން އެދެމުން އަންނަކަމަށް ސައީދު ވިދާޅުވި އެވެ. އަދި އެކަން މާޗެންޑައިޒް ޕްރޮމޯޝަންއެއްގެ ތެރޭގައި ވަރަށް އަވަހަށް ފައްޓާނެ ކަމަށް ވެސް ވިދާޅުވި އެވެ.
ޒުވާނުންނަށްޓަކައި ރައީސް ޔާމީން އަބަދުވެސް ބޭނުންވީ އާ މަސައްކަތްތަކެއް ކުރައްވަންކަން ފާހަގަކޮށް ސައީދު ވިދާޅުވީ ރައީސް ޔާމީން ވެރިކަމަށް ވަޑައިގެންނެވި އިރު ކުޑަކުދިންގެ ގޮތުގައި ތިބި މިއަދު ޒުވާނުން، އާގޮތްތަށް ބޭނުންވާކަމަށް ބުނަމުން އަންނަކަމަށެވެ. އަދި ތަރައްގީގެ އާ ވިސްނުންތަކާއި އެކު ކަންކަން ދެންވެސް ކޮށްދެއްވާނީ ރައީސް ޔާމީން ކަމަށް ސައީދު ވިދާޅުވި އެވެ.
ސައީދު ވިދާޅުވީ ރައީސް ޔާމީން ޒުވާނުންނާއި މެދު ގެންގުޅުނު ވިސްނުމަށްބަލާ ވަރަށް އަވަހަށް ސްޕޯޓްސް ކެފޭއެއް ވެސް ތައާރަފްކުރާނެ ކަމަށެވެ.
ޕީޕީއެމް، ޕީއެންސީ ކޯލިޝަނުން ޕާޓީގެ މެމްބަރުންނަށް ލޯޔަލްޓީ ކާޑު ތައާރަފު ކުރިއިރު އެންމެ ފުރަތަމަ ޕްލެޓިނަމް ކާޑު، ރައީސް އަބްދުﷲ ޔާމީނަށް ވަނީ އަރުވާފަ އެވެ.
