އީވާ މިހެން ވިދާޅުވީ، ވެންޓިލޭޓަރު މައްސަލާގައި މިނިސްޓަރު އަމީންގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅުމާއިމެދު ގޮތެއް ނިންމުމަށް މިއަދު ބޭއްވި އެމްޑީޕީގެ ޕާލިމެންޓަރީ ގުރޫޕުގެ ބައްދަލުވުމުގައި ވާހަކަ ދައްކަވަމުންނެވެ. މި ބައްދަލުވުމުގައި އީވާ ދެއްކެވި ވާހަކައިގެ ވީޑިއޯއެއް މިހާރު ދަނީ ސޯޝަލްމީޑިއާގައި ދައުރުވަމުންނެވެ.
އީވާ ވިދާޅުވީ، މިނިސްޓަރު އަމީންއަށް އެމްޑީޕީގެ ސުޕަ މެޖޯރިޓީއެއް އޮތް މަޖިލީހަކުން ރުހުން ދިނުމުން، އެ ރުހުމާއި މުޅިން ހިލާފަށް، އަދި ޕާޓީގެ ވިސްނުމާއިވެސް މުޅިން ހިލާފުވާގޮތަށް، ވެންޓިލޭޓަރު ހޯދުމުގައި ހިޔާނާތްތެރި ވެފައިވާކަމަށް ތުހުމަތު ކުރައްވާފައެވެ. އެހެންކަމުން މިހާލަތުގައި މިނިސްޓަރު އަމީން ބޭރުކުރަން ޖެހޭކަމަށް އެމްޑީޕީގެ ޕާލިމެންޓަރީ ގުރޫޕަށް ބުނަން ނުކެރޭނަމަ، ޕާލިމެންޓަރީ ގުރޫޕެކޭ މިއަދުގެ އޭސީސީއެކޭ އެއްވެސް ތަފާތެއް ނެތްކަމަށް ވިދާޅުވި އެވެ.
އަދި އީވާ ވަނީ، ޖޭޕީގެ ވަޒީރަކު ވައްކަން ކުރުމުން އޭނާ ބޭރުކުރަން ޖެހޭކަމަށް، ސުޕަ މެޖޯރިޓީއެއް ލިބިފައިވާ ޕާލިމެންޓަރީ ގުރޫޕަކަށް ސާބިތުކަމާއިއެކު ބުނަން ނުކެރޭނަމަ އެމްޑީޕީގެ މެމްބަރުންނާއިމެދު ރައްޔިތުންގެ އިތުބާރު ގެއްލޭކަމަށް ވިދާޅުވެފަ އެވެ.
އީވާ ވިދާޅުވީ މިމައްސަލައިގައި ރައީސް އިބްރާހިމް މުހައްމަދު ސާލިހު ނިންމެވި ގޮތެއް، ނުވަތަ ރައީސް ނަޝީދު ނިންމެވިގޮތެއް ރައްޔިތުން ނާހާނެ ކަމަށާއި، ރައްޔިތުން ބަލާނީ ރައްޔިތުން ތަމްސީލުކުރުމަށް ހޮވާފައި ތިއްބެވި މެމްބަރުންނަށް ކަމެއް ނުކުރެވުނުކަމަށް ކަމަށެވެ.