އޭސީސީގެ އޮފިޝަލަކު މިރޭ ވިދާޅުވީ ވެންޓިލޭޓަރުގެ މައްސަލައިގައި ޕީޖީގެ ނިންމުން ރިވިއުކޮށްދިނުމަށް އެދި ހުށަހަޅާފައި ވަނީ މިއަދު ކަމަށެވެ.
ކޮވިޑް-19 އާއި ގުޅިގެން ގެނައުމަށް ނިންމި ވެންޓިލޭޓަރުތައް ގެނައުމަށް ހަވާލުކުރުމުގައި ކޮރަޕްޝަނަށް މަގުފަހިވާގޮތަށް އަމަލުކޮށްފައިވާ ކަމަށް މައްސަލަ ތަހުގީގު ކުރުމަށްފަހު އޭސީސީން ވަނީ ބުނެފައެވެ. އެ މައްސަލައިގައި 11 ފަރާތެއްގެ މައްޗަށް ދައުވާކޮށްދިނުމަށް އެދި އޭސީސީން މައްސަލަ ޕީޖީ އަށް ފޮނުވިއިރު ޕީޖީން މިމަހުގެ 20 ވަނަ ދުވަހު ނިންމެވީ އެ މައްސަލައިގައި ދައުވާ ނުކުރުމަށެވެ.
ޕީޖީ ހުސައިން ޝަމީމް އެ މައްސަލައާއި ގުޅޭގޮތުން ވިދާޅުވީ، އެ މައްސަލައިގައި އޭސީސީން ފޮނުވާފައިވާ ލިޔެކިޔުންތަކަށް ބިނާކޮށް މީހަކަށް ދައުވާއެއްކުރާ ވަރަށް އަދި ސާބިތުކޮށްދެވޭވަރަށް ހެކި ނެތްކަމަށެވެ.
އެކަމަކު އޭސީސީން އޭރު ވެސް ބުނެފައި ވަނީ އެ މައްސަލަ ފޮނުވީ ދައުވާ ކުރެވޭ މިންވަރަށް ހެއްކާއި ގަރީނާ ހުރުމުން ކަމަށެވެ.
