Advertisement

ސެންޓާ ފޯ ހަޔަ ސެކަންޑްރީ އެޑިޔުކެޝަން (ސީއެޗްއެސްއީ)ގެ އިސްލާމް ޓީޗަރަކު ދަރިވަރުންނަށް ޖިންސީ ފުރައްސާރަކުރި މަައްސަލައެއް އެޑިޔުކޭޝަން މިނިސްޓްރީން ބަލަން ފަށައިފި އެވެ.

އެޑިޔުކޭޝަން މިނިސްޓްރީން މިރޭ ނެރުނު ބަޔާނެއްގައި ބުނީ އިސްލާމް މުދައްރިސެއް ކަމަށްވާ ހަސަން ޒަރީރާ ގުޅޭގޮތުން ސޯޝަލް މީޑިއާގައި ދައުރުވަމުންދާ ވާހަކަތަކާ ގުޅިގެން އެކަން މިނިސްޓްރީން ގެންދަނީ ސީރިއަސް މައްސަލައެއްގެ ގޮތުގައި ބަލަމުން ކަމަށެވެ.

އެގޮތުން މިހާތަނަށް ބެލިބެލުމުން ދަރިވަރުން ފާހަގަކޮށްފައިވާ ކަންކަމަކީ ހަސަން ޒަރީރުގެ ފަރާތުން ހިނގާފައިވާ ކަންކަން ކަމުގައި ބެލެވޭ ކަމަށާއި އެފަދަ ކަންކަމަކީ އިތުބާރުކުރެވޭ ފަދަ މަގާމެއްގައި ހުރި މީހަކު އޭނާގެ ބެލެހެއްޓުމުގައިވާ ފަރާތަކާމެދު ހިންގައިގެންވާނެ އަމަލުތަކެއް ކަމުގައި ނުދެކޭ ކަމަށްވެސް ބަޔާނުގައިވެ އެވެ.

"ކިލާސް ރޫމް އަދި ސުކޫލް މާހައުލަކީ ދަރިވަރުންނަށް ރައްކާތެރި މާޙައުލަކަށް ހެދުމަށް މިނިސްޓްރީ އޮފް އެޑިއުކޭޝަނުން އަބަދުވެސް އިސްކަންދެމެވެ. މިގޮތުން އެއްވެސް ބާވަތެއްގެ ފުރައްސާރައެއް ދަރިވަރަކަށް ކުރިމަތިވާނެފަދަ އަމަލެއް ސްކޫލުގެ އެއްވެސް މުވައްޒަފެއްގެ ފަރާތުން ހިންގާފައިވާނަމަ އެކަމެއް ބަލައި އެންމެ ހަރުކަށި ފިޔަވަޅު އަޅާނެއެވެ." އެޑިއުކޭޝަން މިނިސްޓްރީން ބުނެއެވެ.

އެޑިއުކޭޝަން މިނިސްޓްރީން ބުނީ މިވޭތުވެދިޔަ އަހަރުތެރޭގައި އަމަލުކޮށްފައިވާނީ ވެސް އެގޮތުގެ މަތިން ކަމަށް ވަނީ ބުނެފައެވެ. އެމިނިސްޓްރީއިން އެންމެހާ ދަރިވަރުންނާއި ބެލެނިވެރީންނަށް ޔަގީންކޮށް އަރުވަނީ ދަރިވަރެއްގެ ޖިސްމަށް، އަބުރަށް، ކަރާމާތަށް އުނިކަމެއް އަތުވެދާނެފަދަ ކަމެއް އެއްވެސް ފަރާތަކުން ކުރާނަމަ އެކަމެއް ބަލައި ފިޔަވަޅުއަޅާނެ ކަމަށެވެ.

"ސުކޫލް މާހައުލަކީ ރައްކާތެރިކަމާއެކު ހިނިތުންވެތިބެ އުނގެނުމަށް ފަހި ފުރުސަތުތައް ތަނަވަސްވެފައިވާ ތަނެއް ކަމުގައި ހެދުމަށް އަބަދުވެސް މިނިސްޓްރީއިން މަސައްކަތް ކުރާނެއެވެ." އެޑިއުކޭޝަން މިނިސްޓްރީން ބުނެއެވެ.