ދައުލަތުގެ މީޑިއާ ޕީއެސްއެމަށް މިއަދު ދެއްވި އިންޓަވިއުއެއްގައި ޝަމާލް ވިދާޅުވީ ނޮވެމްބަރު 3، 1988 ގެ ހަމަލާއާ ސިފައިން ކުރިމަތިލިއިރު، އެހާ ބޮޑު ކަމަކަށް ތައްޔާރުވެފައި ނުވާ ކަމަށެވެ.
އެ ދުވަހު ސްރީލަންކާގެ ޓެރަރިސްޓް ޖަމާއަތަކާއި ދިވެހިންގެ ބަޔަކު ގުޅިގެން ދިން ހަމަލާއަކީ "ވިސްނާލާފައި އޮތް ވަރަށް ވުރެ ބޮޑު ކަމެއް" ގެ ގޮތުގައި ޝަމާލް ސިފަކުރެއްވި އެވެ.
ޝަމާލް އިތުރަށް ވިދާޅުވީ އެ ހަމަލާއަށް ފަހު ދިވެހި ދިފާއީ ބާރުގައި އަސްކަރިއްޔާއެއްގެ ސިފަ ޖެހެން ފެށި ކަމަށާއި ހަތިޔާރު ހޯދުމާއި އަސްކަރީ ތަމްރީން ހޯދަން ފެށުނީ އޭގެ ފަހުން ކަމަށެވެ.
ކޮންމެ އަހަރެއްގެ ވެސް ނޮވެމްބަރު 3 ނަސްރުގެ ދުވަހުގެ ގޮތުގައި ފާހަގަކުރަނީ ސްރީލަންކާގެ ހަނގުރާމަވެރި ޖަމާއަތަކާއި ރާއްޖޭގެ ބައެއް މީހުން ގުޅިގެން 1988 ވަނަ އަހަރު ރާއްޖޭގެ ގާނޫނީ ވެރިކަން ބަދަލުކޮށްލަން ދިން އުދުވާނީ ހަމަލާގައި ޝަހީދުވި 19 ދިވެހިންގެ ހަނދާނު ގައެވެ.
