ދައުލަތުން 2021 ވަނަ އަހަރަށް ހުށަހަޅާފައިވާ ބަޖެޓާއި ގުޅޭގޮތުން ވާހަކަ ދައްކަވަމުން ސަނީފް ވިދާޅުވީ، މިވަގުތު ގިނަ ރައްޔިތުން ބޯހިޔާވަހިކަމަށް ބޭނުންވެފައިވާ ކަމަށެވެ. އެގޮތުން ތިނަދޫ ރައްޔިތުންވެސް ބޭނުންވަނީ ބޯހިޔާވަހިކަން ކަމަށާއި، މިގޮތަށް ބޯހިޔާވަހިކަމަށް ބޭނުންވެފައިވާ ރަށްތަކެއް އެބަހުރި ކަމަށެވެ.
ބަޖެޓްގައި ޖަހާ ކަންކަން ނުވާކަމުގެ ޝަކުވާ ފާހަގަކޮށް ސަނީފް ވިދާޅުވީ، 2019 ވަނަ އަހަރުން ފެށިގެން ބަޖެޓްގައި ހުވަދޫގައި 1500 ހައުސިން ޔުނިޓް އެޅުމަށް ޖަހާފައިވާ ކަމަށާއި، އެހެން ނަމަވެސް އެކަންކަމުގެ ތަފްސީލެއް ނޭނގޭކަމަށެވެ. އަދި ނުކުރެވޭނެ ކަންކަން ބަޖެޓްގައި ޖެހުމުގެ ބޭނުމެއް ނެތް ކަމަށް ވެސް ވިދާޅުވި އެވެ.
ކުރިއަށް އޮތް އަހަރަށް ލަފާކޮށް ހުށަހަޅާފައިވާ ބަޖެޓުގައި ތިނަދޫގައި މަތީ ތައުލީމުގެ ފުރުސަތު ހިންގުމަށް ޖަހާފައިވާ އަދަދުތަކަކީ އެކަންކަން ކުރެވޭނެ އަދަދުތަކެއްކަމަށް ނުދެކޭކަމަށް ސަނީފް ވިދާޅުވި އެވެ.
ގައުމީ ޔުނިވާސިޓީގެ ކެމްޕަހަކާއި ދަނާލަކީ ތިނަދޫ އަށް މުހިންމު ކަންކަން ކަމަށާއި، އެހެން ނަމަވެސް މިދިޔަ އަހަރުވެސް އެ އަދަދުތައް ބަޖެޓްގައި ޖަހައިގެން އެކަންކަން ހިނގާފައިނުވާ ކަމަށް ސަނީފް ވިދާޅުވި އެވެ. އަދި މަސައްކަތްތައް ނުކުރެވޭ ވަރުގެ އަދަދަކާއި އެކު ތަކުރާރުކޮށް ބަޖެޓްގައި މަސައްކަތްތައް ހުރުމުން އެހެން ރަށްރަށާއި ތިނަދޫ ރައްޔިތުންގެ މެދުގައި އުފެދެނީ ނަފްރަތުކަމަށް ވެސް ސަނީފް ވިދާޅުވި އެވެ.
ބަޖެޓްގައި މަޝްރޫއުތައް ޖެހުމަށްފަހު އެ މަސައްކަތްތައް އަހަރު ނިމޭއިރުވެސް ނުހިންގާހުރެ ޖެހިގެން އަންނަ އަހަރުގެ ބަޖެޓްގައި ހިމަނާ ހިމެނުމާއި މެދު މީގެ ކުރިންވެސް މެމްބަރުން ކަންބޮޑުވުން ފާޅުކޮށްފައިވެ އެވެ.
