ރައްޔިތުންގެ މަޖިލީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ، "ފައްޔާޒް ވަކިކުރުމަށް މަޖިލީހަށް ކަމެއް ލާކަށެއް" ނޫޅުއްވާކަމަށެވެ.
އެމްޑީޕީގެ އެތެރޭގައި ބަހުސްތައް ހިންގަންޖެހޭކަން ފާހަގަކޮށް ރައީސް ނަޝީދު ވިދާޅުވީ އެ ބަހުސްތަކަކީ އެމްޑީޕީގެ ތެރޭގައި ކުރިއަށްދާނޭ ބަހުސްތައްމަށެވެ.
ރައީސް ނަޝީދު ވިދާޅުވީ މިނިސްޓަރަކާއި މެދު އިތުބާރު އޮތްތޯ ނުވަތަ ނެތްތޯ އަދި ސަރުކާރަށް އެންމެ ފައިދާބޮޑު ގޮތާއި ރައްޔިތުންނަށް އެންމެ ރަނގަޅުގޮތާއި ގުޅޭގޮތުން އެމަނިކުފާނު ވާހަކަ ދައްވަންޖެހޭ ހާލަތުގައި އެކަން ކުރުމަކީ މައްސޫލިޔަތެއްކަމަށް ދެކެވަޑައިގަންނަވާ ކަމަށެވެެ.
މިނިސްޓަރު ފައްޔާޒްގެ އިތުބާރު ނެތްކަމުގެ މައްސަލައެއް މަޖިލީހަށް ވެއްދުމަށް އެމްޑީޕީގެ މަޖިލިސް މެމްބަރުންގެ މެދުގައި ސޮއި ހަމަކުރުމަށް މަސައްކަތްތައް ފެށިކަމުގެ އަޑުތަކެއް މީގެ ކުރިން ފެތުރުނެވެ. އަދި މިނިސްޓަރު ފައްޔާޒް މަގާމުން އަމިއްލަފުޅަށް އިސްތިއުފާ ދެއްވުމަށް ދެންނެވުމަށް ރައީސް ނަޝީދު އެމްޑީޕީގެ ޗެއާޕާސަނަށް ފޮނުވި ސިޓީއެއްގައި އެދިވަޑައިގެންފައިވެ އެވެ.
ފައްޔާޒްގެ މައްޗަށް ކޮރަޕްޝަންގެ ތުހުމަތު އެމްޑީޕީގެ ބައެއް މެމްބަރުން ކުރާއިރު ފައްޔާޒް ވަނީ އެކަންކަން ދޮގުކުރައްވާފަ އެވެ. އަދި މަގާމުން އިސްތިއުފާ ދެއްވާނީ ރައީސް އެގޮތަށް އެދުމުން ކަމަށް ވެސް މީގެ ކުރިން ފައްޔާޒް ވިދާޅުވެފައިވެ އެވެ.
