އަދުރޭ މިހެން ވިދާޅުވީ، ހޯރަފުށި އެއާޕޯޓް ހުޅުވުމަށްޓަކައި ބޭއްވި ރަސްމިއްޔާތުގައި، ބަޖެޓާއި ގުޅޭގޮތުން ރައީސް ދެއްކެވި ވާހަކަފުޅަށް ފާޑުވިދާޅުވެ ކުރެއްވި ޓްވީޓެއްގައެވެ.
އެރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ، ރައްޔިތުންގެ މަޖިލީހަށް ސަރުކާރުން ހުށަހަޅާފައިވާ 34.6 ބިލިއަން ރުފިޔާގެ ބަޖެޓަކީ މިވަގުތަށް ހުށަހެޅޭނެ އެންމެ ރަނގަޅު ބަޖެޓް ކަމަށެވެ.
މިވާހަކަފުޅަށް ފަޑުވިދާޅުވަމުން އަދުރޭ ކުރެއްވި ޓްވީޓުގައި ވިދާޅުވީ، ރައީސްގެ މިވާހަކަފުޅުން ކަށަވަރުވި ކަމަކީ، އެމަނިކުފާނަށް ދަރަންޏާއި އަރަންޏާއި ރިޒާވަކީ ކޯއްޗެއްކަން އެނގިވަޑައި ނުގަންނަވާކަން ކަމަށާއި، ގޮތްހުސްވެ ހައްދަވާނެގޮތެއް އެނގިވަޑައިނުގެން ތުރުތުރު އަޅުއްވާކަން ކަމަށެވެ.
ބަޖެޓާއި ގުޅޭގޮތުން ވާހަކަ ދައްކަވަމުން ރައީސް ވަނީ، ބަޖެޓުގައި ކެޕިޓަލް ހަރަދުތަކުގެ ގޮތުގައި ކަނޑައަޅާފައި ވަނީ ހަނިމާދޫ އެއާޕޯޓާއި އައްޑޫ އެއާޕޯޓް އަދި ބްރިޖާއި މާލޭ ވިޔަފާރި ބަނދަރުގެ އިތުރުން ރާއްޖޭގެ ހުރިހާ ރަށެއްގެ ފެނާއި ނަރުދަމާ ގާއިމުކުރުމާއި ރާއްޖޭގެ ފަސް ސަރަހައްދެއްގައި ޓާޝަރީ ހޮސްޕިޓަލް ގާއިމުކުރުން ކަމަށާއި، އެ ޕްރޮޖެކްޓްތަކުގެ ފައިސާ ހުރީ ހަމަޖެހިފައި ކަމަށް ވިދާޅުވެފައެވެ.
