ބަޖެޓްގެ ވާހަކައިން ތަަރައްގީގެ ވާހަކަ ދައްކާއިރު ފާހަގަކުރަންޖެހޭ ކަމަކީ، އުންމީދު ކަނޑާނުލާ މަސައްކަތްކުރާ ކަމުގައި ވާނަމަ އަލިމަގެއް ފެންނާނެކަމަށް މީހުން ބުނެ އުޅޭ ވާހަކަ އަށެވެ. ކޮވިޑް-19 ގެ ދަތި އަނދިރި ދުވަސްތަކުގައި ވެސް ސަރުކާރުން ވަނީ އާމްދަނީ އެއް ލިބޭނޭގޮތް ނެތިފައި ތިބި ރައްޔިތުންނާއި ވިޔަފާރިތަކަށް ބޮޑެތި އެހީތަކެއް ފޯރުކޮށްދީފަ އެވެ. އަދި އޭގެ އިތުރުން ސަރުކާރު އެއްވެސް މުވައްޒަފެއްގެ މުސާރައަށް އުނިކަމެއް ނާންނާނޭ މަގުން މަސައްކަތްކޮށް ތަރައްގީގެ މަޝްރޫއުތައް ހުއްޓާނުލާ ކުރިއަށް ގެންދިޔަކަމީ މިސަރުކާރާއި މެދު އުންމީދު ގެއްލުވާނުލާ ސާބިތުކަމާއި އެކު ތިބެންވީ އެއް ސަބަބެވެ.
ކޮވިޑް-19 އާއި އެކު ހުއްޓިފައިވާ ރާއްޖޭގެ އިގްތިސާދު ހިންގައިގަތުމަށް މިދަނޑިވަޅަށް ބޭނުންވާ އެކައްޗަކީ ތަރައްގީގެ ބިޔަ މަޝްރޫއުތައް ހިންގުމެވެ. ސަރުކާރުން އަންނަ އަހަރަށް ލަފާކުރާ ދައުލަތުގެ ބަޖެޓް އެކުލަވާލާފައިވަނީ މި މަގުންނެވެ.
ގުޅީފަޅުގައި ތަރައްގީކުރާ ޕޯޓާއި، މާލެ - ވިލިނގިލި - ގުޅިފަޅު - ތިލަފުށި ގުޅުވާލެދޭ ބޮޑު ބްރިޖަކީ މީގެ ތެރެއިން ފާހަގަކުރަންޖެހޭ ކަންކަމެވެ. ފިނޭންސް މިނިސްޓްރީން މައުލޫމާތު ދެއްވާ ގޮތުންނަމަ، މި ބިޔަ މަޝްރޫއުތަކަށް ބޭނުންވާ ފައިސާ މިހާރު ވަނީ ހަމަޖެހިފައެވެ. މި ޕްރޮޖެކްޓް ތަކަކީ ޔަގީންކަމާއި އެކު ފެށި އަދި ކުރިއަށްދާނޭ ބިޔަ މަސައްކަތްތަކެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ސަރުކާރުގެ ފަރާތުން މަޖިލީހަށް ހުށަހެޅިއިރު ބިޔަ ބޮޑު ތަރައްގީގެ މަޝްރޫއުތައް ހިމަނާފައިވަނީ ސަރަހައްދީ ތަރައްގީއަށް އިސްކަން ދީގެންނެވެ. ލ.ގަމުގައި ގާއިމްކުރަން ނިންމާފައިވާ ބައިނަލްއަގްވާމީ ކެންސަރު ހޮސްޕިޓަލާއި، ހަނިމާދޫ އެއާޕޯޓު އިންޓަނޭޝަނަލް އެއާޕޯޓެއްގެ ގޮތުގައި ތަރައްގީކުރުމުގެ މަޝްރޫއުއާއި އައްޑޫސިޓީ ގަން އެއާޕޯޓު ތަރައްގީކުރުމުގެ މަޝްރޫއުގެ އިތުރުން އުތުރުގައި ގާއިމުކުރުމަށް ނިންމާފައިވާ ހައި ސްޕީޑް ފެރީ ނިޒާމުގެ މަޝްރޫއުން، ސަރަހައްދީ ތަރައްގީއަށް އިސްކަން ދީފައިވާކަމަށް ހެކިދެ އެވެ.
ރައީސް އިބްރާހިމް މުހައްމަދު ސޯލިހްގެ ސަރުކާރުގެ ވިސްނުންފުޅު ހުރީ "ތަރައްގީ ލާމަރުކަޒު" ކުރުމަށެވެ. މުޅި ރާއްޖެ ތަރައްގީ ވާނޭ ގޮތަށް އިގްތިސާދީ ތަރައްގީގެ މަޝްރޫއުތައް ކުރިއަށް ގެންދިއުމަށެވެ.
ތަރައްގީގެ މިބިޔަ ވާހަކަތަކާއި އެކު އެންމެ ބާރަށް ދެކެވެނީ ދަރަނީގެ ވާހަކަ އެވެ. އެވާހަކަތަކަށް ރައްދެއްގެ ގޮތުގައި ރައީސް އިބްރާހިމް މުހައްމަދު ސޯލިހްގެ ބަސްކޮޅު ފުދެއެވެ.
"މި އަހަރުގެ ބަޖެޓުގައި، ދަރަނި ދެއްކުމަށް ޖަހާފައި އޮތް 4 ބިލިއަން ރުފިޔާއަކީ ކުރީގެ ސަރުކާރުތަކުން ނަގާފައި ހުރި ދަރަނިތައް ދައްކަން ޖަހާފައި ހުރި ފައިސާ. މިއީ އަޅުގަނޑު މިއަދު ތިޔަބޭފުޅުންނަށް ސާފުކޮށްދޭން ބޭނުންވާ ވާހަކައަކީ. އާދެ، ފައިސާ ހޯދަންޖެހޭ. އަޅުގަނޑުމެންނާ ހިސާބަށް ވާރުތަވީއިރުގައި، ދައުލަތުގެ ރިޒަރވަކު ނެތް ލާރިއެއް. 250 މިލިއަން ޑޮލަރު އޮތީ. ދެން ކިހިނެއްތޯ ކަންތައް ކުރާނީ؟ މި ދަތި ހާލުގައިވެސް އަޅުގަނޑުމެންގެ ރިޒާވްގައި މިހާރުވެސް ހުންނާނެ 250 މިލިއަން ޑޮލަރު،" އިހަވަންދޫގައި ވާހަކަ ދައްކަވަމުން ރައީސް ވިދާޅުވި އެވެ.
ރާއްޖޭގެ ކުރިއަރުވައި އިގްތިސާދު ހިންގައިގަތުމަށް އަދި އާރާސްތުކުރުމަށް އަންނަ އަހަރުތެރޭ ބިޔަ ބޮޑެތި މަޝްރޫއުތަކެއް ކުރިއަށް ގެންދިޔުމަށް ސަރުކާރުން ތައްޔާރުވަމުން އަންނައިރު އަންނައަހަރު ވެގެންދާނީ އިގްތިސާދީގޮތުން ރާއްޖެއަށް ތާރީހީ އަހަރަކަށް ނޫނީ ނުވާނެ އެވެ. 2021 ވެގެންދާނީ ބިޔަ ބޮޑެތި މަޝްރޫއުތަކުގެ އަހަރަށެވެ. 2021 ވެގެންދާނީ ހުވަފެންތަކުގައި ހަގީގީ ކުލަ ޖައްސުވައިދޭ އަހަރަށެވެ.
