ނަޝީދު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި، ގައްދޫ ދާއިރާގެ އެމްޑީޕީގެ މެމްބަަރު އަހުމަދު ޒާހިރު، ހެލްތު މިނިސްޓަރު އަހުމަދު ނަސީމަށް ކުރެއްވި ސުވާލެއްގެ ޖަވާބު އިއްވުމުގެ ކުރިންނެވެ.
ނަޝީދު ވިދާޅުވީ މިނިސްޓަރު މިއަދުގެ ޖަލްސާއަށް ވަޑައިގެންނެވިނަމަ، ވެކްސިންގެ މަސައްކަތާއި ގުޅޭގޮތުން މިނިސްޓަރާއި ސުވާލުކޮށްލެވުނީސް ކަމަށެެވެ. އެގޮތުން ވެކްސިންގެ ކަންތައް، ވެންޓިލޭޓަރަށް ވީގޮތަށް ވިޔަނުދިނުމަށް މިހާރުއްސުރެ އެކަމަށް ސަމާލުވެ ތިބެންޖެހޭކަމަށް ނަޝީދު ވިދާޅުވި އެވެ.
ދުބާއީގެ ކުންފުންޏަކާއި ހަވާލުކޮށްގެން ރާއްޖެއަށް ގެންނަން އުޅުނު ވެންޓިލޭޓަރުތަކުގެ މައްސަލައަށް އިޝާރާތް ކުރައްވައި ރައީސް ނަޝީދު ވިދާޅުވީ، ކޮވިޑާއި ގުޅިގެން އަދިވެސް ވެންޓިލޭޓަރެއް ރާއްޖެ އަށް ގެނެވިފައި ނުވާ ކަމަށެވެ. އަދި ވެކްސިން ކަންތައްތައް އެގޮތަށް ދިމާވެއްޖެނަމަ އެއީ ވަރަށް ހައްސާސް މައްސަލައަކަށް ވެގެން ދާނެކަމަށްވެސް ނަޝީދު ވިދާޅުވި އެވެ.
ވެންޓިލޭޓަރު މައްސަލައިގައި ކުރިން ހެލްތް މިނިސްޓަރު ކަމުގެ މަގާމުގައި ހުންނެވި އަބްދުﷲ އަމީން ވަނީ މަގާމުން އިސްތިއުފާ ދެއްވާފަ އެވެ. އެގޮތުން ކޮވިޑާއި ގުޅިގެން ރާއްޖެއަށް ވެންޓިލޭޓަރު ގެނައުމުގައި ބޮޑެތި ކޮރަޕްޝަންތަކެއް ހިންގިކަމުގެ ތުހުމަތު އަމީންގެ މައްޗަށް ކުރެވި މަގާމުން ވަކިކުރުމަށް މަޖިލީހަށް މައްސަލަ ވައްދާ، ޖަވާބުދާރީވުމަށް ނޯޓިސް ވެސް ފޮނުވާފައިވަނިކޮށް އަމީން އިސްތިއުފާ ދެއްވާފައި ވަނީ އޮކްޓޫބަރު މަހުގެ 20 ވަނަ ދުވަހުގެ ދަންވަރުގެ ވަގުތެއްގަ އެވެ.
