އަންނަ އަހަރަށް ލަފާކުރާ ދައުލަތުގެ ބަޖެޓް މަޖިލީހުގެ ބަޖެޓް ދިރާސާކުރާ ކޮމިޓީން ދިރާސާކުރުމަށްފަހު ހުށަހެޅި ރިޕޯޓަށް ވާހަކަ ދައްކަވަމުން ސައީދު ވިދާޅުވީ މި ބަޖެޓް ވަރަށް ބޮޑަށް ގޯސް ކަމަށާއި މިބަހުސްގައި މެމްބަރުންގެ ޝައުގުވެރިކަން ކެނޑިފައި އޮތީ ބަޖެޓް ގޯސްވުމުގެ ސަބަބުން ކަމަށެވެ.
ބަޖެޓަށް ވާހަކަ ދައްކާ ބައެއް މެމްބަރުންނަށް ބަޖެޓް ރަނގަޅުވީ ރައީސް އިބްރާހިމް މުހައްމަދު ސޯލިހް، ރައީސް މުހައްމަދު ނަޝީދުގެ ގެކޮޅަށް ވަޑައިގަތުމުން ކަމަށާއި، ބަޖެޓް ރަނގަޅުވުމާއި ގޯސްވުން އޮތީ ދެ ރައީސުންގެ އަތުގައި ކަމަށް ސައީދު ވިދާޅުވި އެވެ.
ސައީދު ވިދާޅުވީ މިއީ އެމްޑީޕީގެ ބަޖެޓެއް ނޫން ކަމަށާއި އެމްޑީޕީގެ ސަރުކާރެއްގައި އިގްތިސާދީ ހުރިހާ މިނިސްޓްރީއެއް އޮތީ ކޯލިޝަންގެ އެހެން ޕާޓީތަކުގެ އަތުގައި ކަމަށެވެ.
ސައީދު ވިދާޅުވީ ބަޖެޓްގައި ނޫ އިގްތިސާދަށް އޮތީ 200 އެއްހާ މިލިއަން ރުފިޔާ ކަމަށެވެ. އަދި އޮފްޝޯ ޕްލެޓް ފޯމާއި ގޭދޮށު މަސްފެކްޓްރީ ކޮބައިތޯ ސައީދު ސުވާލު އުފެއްދެވި އެވެ.
ސައީދު ވިދާޅުވީ އެމްޑީޕީން ޖަޒީރާ ދިރިއުޅުން ކިޔުމަށްފަހު މާލެ ސަރަހައްދަށް ބަޖެޓުގެ 89 އިންސައްތަ ޖަހާފަ އެބައޮތް ކަމަށެވެ.
ރައްޔިތުން ތިބީ އަނގަޔާ އަތާ ދިމާނުވެފަައި ކަމަށާއި، ނޫ އިގްތިސާދުގެ ވާހަކަ ދައްކަން އެމްޑީޕީ ލަދުގަންނަންޖެހޭނެ ކަމަށް ސައީދު ވިދާޅުވި އެވެ. އަދި އަންނަ އަހަރަކީ ޓީ ބިލްގެ އަހަރެއް ކަމަށާއި، އެކަމުގެ ސަބަބުން ކުދި ވިޔަފާރިތައް އިނދަޖެހޭނެ ކަމަށްވެސް ވިދާޅުވި އެވެ.
