Advertisement

ހުޅުމާލޭގައި އެންސިސް ކުންފުނިން ތަރައްގީކޮށްފައިވާ "އެންސިސް ކޭނިން ފެކްޓްރީ" އަށް 400 ވަޒީފާއަކަށް މުވައްޒަފުން ހޯދަން އޯޕަންޑޭއެއް ބާއްވަން ތައްޔާރުވެއްޖެ އެވެ.

އެ ހަރަކާތް ފެށުމަށް ހަމަޖެހިފައި ވަނީ އަންނަ ހޮނިހިރު ދުވަހު ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށް، ހުޅުމާލޭ އިންޑަސްޓްރިއަލް ޒޯންގައި ހުންނަ އެންސިސް ކޭނިންގް ފެކްޓްރީގަ އެވެ.

އެ ދުވަހުގެ އިވެންޓްތަކުގެ ތެރޭގައި، ބޮޑެތި މީހުންނަށް ފެކްޓްރީ ބަލާލުމުގެ ފުރުސަތާއި، ކުޑަކުދިންނަށް ހާއްސަކޮށްގެން ބާއްވާ މެޖިކް ޝޯއަކާއި ރޭގަނޑު ގަޑީގައި ބޮޑުބެރުގެ އިތުރުން، އޯޕަންޑޭ އިވެންޓަށް ޒިޔާރަތް ކުރައްވާ ފަރާތްތަކުގެ މެދުގައި ވަރަށް ހާއްސަ ލަކީޑްރޯ ނެގުމަށް ވަނީ ހަމަޖެހިފަ އެވެ.

ފަންސަވީސް މިލިއަން ޑޮލަރުގެ އެ ފެކްޓްރީއަކީ، އެންސިސްގެ ތާރީހުގައި މިހާތަނަށް ކުރި އެންމެ ބޮޑު އިންވެސްޓްމަންޓެވެ. ދުވާލަކު 25 ޓަނުގެ ދަޅުގައި މަސް ބަންދު ކުރެވޭ ގޮތަށް ތަރައްގީ ކޮށްފައިވާ އެ ކާރުހާނާއާއެކު، ފިނިކުރި މަސް ރައްކާ ކުރުމަށް 1200 ޓަނުގެ ކޯލްޑް ސްޓޯރޭޖެއް ގާއިމް ކުރެވޭނެ އެވެ.

އޭގެ އިތުރުން މަސްވެރިން ބާނާ މަސް ތާޒާކަންމަތީ ބެހެއްޓުމަށްޓަކައި މަސްވެރިންނަށް އައިސް ފޯރުކޮށްދިނުމަށް، 100 ޓަނުގެ އައިސްޕްލާންޓަކާއި އަދި، މަހުން އުކާލެވޭ ބައިތައް ބޭނުން ކުރުމަށް، ފިޝްމީލް ޕްލާންޓެއް ގާއިމްކުރުމަށް ވަނީ ހަމަޖެހިފަ އެވެ.

ގްރޭޓާ މާލެ ސަރަހައްދުގައި ހުޅުވޭ ފުރަތަމަ ދަޅުމަސް ބަންދުކުރާ އެ ކާރުހާނާގެ ސަބަބުން، ރާއްޖޭގައި ދަޅުމަސް ބަންދު ކުރެވޭ އަދަދު އިތުރުވެގެންދިއުމާއެކު، ދިވެހިން ބާނާމަހަށް ވެލިއުއެޑް ކުރުމުގެ ފުރުސަތު އިތުރުވެގެން ދާނެ އެވެ. އަދި ރާއްޖޭން އެކްސްޕޯޓް ކުރެވޭ ރޯމަހުގެ އަދަދު މަދުވެ، ރާއްޖޭގެ އުފެއްދުންތައް ޔޫރަޕް އަދި އެމެރިކާ ފަދަ މާކެޓްތަކަށް އެކްސްޕޯޓް ކުރުން އިތުރުވެގެން ދާނެ ކަމަށް އެންސިސް އިން ވަނީ ބުނެފަ އެވެ.

އެ ފެކްޓްރީގެ ސަބަބުން ގިނަ އަދަދެއްގެ ދަޅުމަސް އެކަށީގެންވާ އަގެއްގައި، ފަސޭހަކަމާއެކު އާންމުންނަށް ލިބިގެންދާނެ އެވެ.