ކަރަންޓީނު މުއްދަތު 10 ދުވަހަށް ކުރުކުރަން އުޅޭކަމުގެ އިޝާރާތެއް އެންނެ ފުރަތަމަ ދެއްވީ، ގެސްޓްހައުން އެސޯސިއޭޝަން އޮފް މޯލްޑިވްސްގެ ރައީސް އަބްދުﷲ ނަޝީދު ކުރެއްވި ޓްވީޓެއްގައެވެ. ޓޫރިޒަމް މިނިސްޓަރު ޑރ. މައުސޫމް ރީ-ޓްވީޓް ކުރެއްވި މި ޓްވީޓުގައި ވަނީ، ކަރަންޓީނު މުއްދަތު 10 ދުވަހަށް ކުރު ކުރެއްވުމުން ރައީސް އިބްރާހިމް މުހައްމަދު ސޯލިހު އަށާއި މިނިސްޓަރު މައުސޫމްއަށް ޝުކުރު އަދާކުރައްވާފައެވެ.
މިކަން އެޗްޕީއޭއިން ނުވަތަ ކަމާބެހޭ އެހެން އިދާރާއަކުންވެސް އަދި ރަސްމީކޮށް އަންގާފައެއް ނުވެއެވެ. ނަމަވެސް އެޗްޕީއޭއިން މިކަން ދޮގުކޮށްފައި ނުވާކަން ފާހަގަކޮށްލެވެއެވެ. އެގޮތުން ސީއެންއެމްއަށް މައުލޫމާތު ދެއްވަމުން ހެލްތު މިނިސްޓްރީގެ ޑެޕިއުޓީ ޑިރެކްޓަ ޖެނެރަލް ތަސްލީމާ އުސްމާން ވިދާޅުވީ، މިކަމުގައި އަދި ރަސްމީ އަމުރެއް ނެރެފައި ނުވާކަމަށެވެ. އަދި މިވާހަކައަކީ ފެށުނީއްސުރެވެސް ދެކެވޭ ވާހަކައެއްކަން ފާހަގަކުރެއްވި އެވެ.
ރާއްޖެއިން ކޮވިޑް ޖެހުނު މީހުންގެ ޖުމްލަ އަދަދު މިހާރު ވަނީ 13،011 އަށް އަރާފައެވެ.
އެކްޓިވް ކޭސްތަކުގެ އަދަދު 1،019 ގައި އުޅޭއިރު އޭގެރެއިން 95 މީހަކަށް އަންނަނީ ހޮސްޕޮޓަލް ތަކުގައި ފަރުވާދެމުންނެވެ.
މިހާތަނަށް ރާއްޖެއިން މިބަލިން ރަނގަޅު ވެފައިވަނީ 11،939 މީހުންނެވެ. އަދި މިހާތަނަށް މިބަލީގައި ރާއްޖެއިން 47 މީހުންވަނީ މަރުވެފައެވެ.
