މިއަދު އާޒިމް ނ. ލަންދޫ އަށް ވަޑައިގެން އެ ރަށުގައި އެމްޓީސީސީ އިން ކުރިއަށް ގެންދާ ބަނދަރު ތަރައްގީކުރުމުގެ މަޝްރޫއު ކުރިއަށްދާ ގޮތް ބައްލަވާލައްވާފައިވާ އިރު، އާޒިމް ވަނީ އެ އަތޮޅުގެ ހެނބަދޫ އަށާއި މިލަދޫއަށް ވެސް ވަޑައިގެންފަ އެވެ.
ލަންދޫގެ ބަނދަރު ތަރައްގީ ކުރުމުގެ މަޝްރޫއުގެ ދަށުން 25،000 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 256 މީޓަރުގެ ސަރަހައްދެއްގައި އެއްގަމު ތޮށި ލުމާއި، 401 މީޓަރުގެ ސަރަހައްދެއްގައި ބޭރު ތޮށި ލުމާއި، 60 މީޓަރުގެ ސަރަހައްދެއްގައި ރިވެޓްމެންޓް ޖެހުމުގެ އިތުރުން، ބަނދަރު ބައްތި އާއި ނެރު ބައްތި ހަރުކުރުމާއި، 1،280 އަކަ މީޓަރުގެ ސަރަހައްދެއްގައި ޕޭވްމަންޓް ހެދުން ފަދަ މަސައްކަތްތައް ކުރާނެ އެވެ.
ޖުމްލަ 35.6 މިލިއަން ރުފިޔާގެ އެ މަޝްރޫއު މިނިސްޓްރީ އޮފް ނެޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާ އިން އެމްޓީސީސީ އާ ހަވާލުކޮށް، އެއްބަސްވުމުގައި ސޮއިކޮށްފައި ވަނީ މިދިޔަ އަހަރުގެ ޑިސެމްބަރު މަހުގެ 10 ވަނަ ދުވަހު އެވެ.
އެމްޓީސީސީ އިން ރާއްޖޭގެ އެކި ކަންކޮޅުތަކުގައި ތަރައްގީގެ މަޝްރޫއުތައް ކުރިއަށް ގެންދާ އިރު، ދާދިފަހުން އެ ކުންފުނިން ވަނީ ނ. ހެނބަދޫގައި ކުރިއަށް ގެންދިޔަ ބަނދަރު ތަރައްގީ ކުރުމުގެ މަޝްރޫއު ކާމިޔާބުކަމާއި އެކީ ނިންމައިލާފަ އެވެ.
