ހައިލަމް މިހެން ވިދާޅުވީ ސަރުކާރާއި ރައްޔިތުންގެ މަޖިލީހަށް ފާޑިވިދާޅުވަމުން ކުރެއްވި ޓްވީޓެއްގައެވެ. އެގޮތުން މަޖިލީހަށް އަމާޒުކުރައްވައި ހައިލަމް ވިދާޅުވީ، ވަގުން ހިފަން އައި މަޖިލީހަށް ދެއަހަރުވީ ކަމަށާއި، ނަމަވެސް ވައްކަންކުރި އެންމެން ތިބީ ގޭގައި ކަމަށެވެ.
ކްރިމިނަލް ކޯޓުގެ ކުރީގެ އިސް ގާޒީ ހައިލަމް ވިދާޅުވީ، އެމްއެމްޕީއާރުސީގެ ހިޔާނާތާއި ގުޅޭ އެންމެ ރުފިޔާއެއްވެސް ހޯދިފައި ނުވާ ކަމަށާއި، ސަފާރީ ރޭޕްކޭސްއަށް ވީގޮތް އެނގޭ އެއްވެސް މީހަކުވެސް ނެތްކަމަށެވެ.
ހައިލަމްވަނީ، ޖިންސީ ގޯނާގެ ތުހުމަތުގައި މަގާމުން ދުރުކުރެއްވި ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލައަށް އިޝާރާތް ކުރައްވައި ފާޑުވިދާޅުވެފައެވެ. އެގޮތުން ހައިލަމް ވިދާޅުވީ، 10 މީހަކަށް ޖިންސީ ގޯނާކުރި މިނިސްޓަރު ހުންނެވީ ގޭގައި ކަމަށެވެ. އަދި އަނިޔާއާއި ވައްކަމަކީ، ބަޔަކު ދެކޮޅުހަދާ ފަލްސަފާއެކޭ ބުނާތީ އިވޭކަމަށް ވިދާޅުވެ ހައިލަމް ވަނީ ވަރަށް ބޮޑަށް ސަރުކާރަށް ފާޑުވިދާޅުވެފައެވެ.
ބޮޑިހިޔާނާތުގެ މައްސަލާގައި ކުރީގެ ނާއިބު ރައީސް އަހުމަދު އަދީބުއާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ މައްޗަށް އުފުލާފައިވާ ދައުވާތަކާއި ގުޅިގެން އެދެބޭފުޅުން ދައުލަތާއިއެކު ހަދާފައިވާ އެއްބަސްވުންތަކުގެ ސަބަބުން އަދަބު ލުއިކުރުމާއި ގުޅިގެން ހައިލަމް ވަނީ މީގެކުރިންވެސް ފާޑުވިދާޅުވެފައެވެ.
