"ޗެނަލް 13" އިން ގެނެސްދޭ "ތަރާދު" ޕްރޮގުރާމުގައި ވާހަކަ ދައްކަވަމުން މެމްބަރު އަހުމަދު ހަލީމް (ދޮންބިލެތް) ވިދާޅުވީ ރައީސް ޔާމީނަކީ އެމަނިކުފާނުގެ ގާތް އެކުވެރިއެއް ކަމަށާއި، އެމަނިކުފާނު ޖަލުގައި އޮންނަވަން ބޭނުންފުޅު ނުވާކަމަށެވެ. އަދި އެމަނިކުފާނު ޖަލުގައި އޮންނަވާތީ އެކަމާއި ދެރަވާކަމަށް ވެސް ދޮންބިލެތް ވިދާޅުވިއެވެ.
ދޮންބިލެތް ވަނީ ރައީސް ޔާމީން ޖަލުގައި އޮންނަވާ މައްސަލާގައި އެމަނިކުފާނުގެ ޕާޓީ ޕީޕީއެމް ކުއްވެރި ކުރައްވާފައެވެ. ދޮންބިލެތް ވިދާޅުވީ، ރައީސް ޔާމީން ޖަލުގައި އޮންނަވާއިރު، ރާއްޖޭގެ އެއްވެސް ޖަމިއްޔާއެއް މެދުވެރިކޮށްވެސް އަދި ބައިނަލްއަގްވާމީ އެއްވެސް ޖަމްއިއްޔާއެއް މެދުވެރިކޮށްވެސް ރައީސް ޔާމީނާއި އެއްކޮޅަށް ބަޔާނެއް ނެރުއްވަން ޕީޕީއެމްއިން މަސައްކަތް ނުކުރާ ކަމަށެވެ.
އޭނާ ރައީސް ނަޝީދުގެ މައްޗަށް އޭރު ކުރި ޝަރީއަތް ގޯސްކަމަށް ދުނިޔޭގެ އެތައް ޖަމިއްޔާއަކުން ބަޔާން ނެރުއްވި ކަމަށާއި، ނަމަވެސް މިހާތަނަށްވެސް ރައީސް ޔާމީންގެ މައްޗަށް ކުރި ޝަރީއަތް ގޯސްކަމަށް ކަނޑައަޅާފައި ނެތްކަމަށެވެ.
