ކޮވިޑް 19ގެ އާ ސްޓްރެއިނެއް އިނގިރޭސިވިލާތުން ފެނިފައިވަނީ މިހަފްތާތެރޭގައެވެ. މި ވައިރަސް ފެނިފައިވަނީ އިނގިރޭސިވިލާތުގެ ދެކުނު ސަރަހައްދުތަކުންނެވެ. އެގައުމުގެ ސައިންސްވެރިން ބުނާ ގޮތުގައި މި ވައިރަހަކީ ކޮވިޑް-19 އަށްވުރެ ގާތްގަނޑަކަށް 70 ޕަސެންޓް ހަލުއިކަމާއެކު ފެތުރޭ ވައިރަހެކެވެ.
މި ވައިރަހަކީ ކޮރޯނާ ވައިރަސްގެ ވައްތަރެއް ކަމަށްވާ ކޮވިޑް-19 އަށްވުރެ މާ އަވަސްކޮށް ފެތުރޭ ވައްތަރެއްކަން އިނގިރޭސިވިލާތުގެ ސިއްހަތާބެހޭ ވަޒީރު މެޓް ހެންކޮކް ވެސް ވަނީ ކަށަވަރުކޮށް ދެއްވާފައެވެ. މި ވައިރަސް މިހާރު ވަނީ އޮސްޓްރޭލިއާ އިންވެސް ފެނިފައެވެ.
އިނގިރޭސިވިލާތުން ފެނުނު މި ވައިރަހުގެ ސަބަބުން ސައުދީން ވަނީ އުމުރާގެ ހަރަކާތްތައް މެދުކަނޑާލާ، އެ ގައުމުގެ ބޯޑަރުތައް އަލުން ބަންދުކޮށްފައެވެ. އަދި އެގައުމުން މިކަމާ ގުޅިގެން އެކި ރައްކާތެރިކަމުގެ ފިޔަވަޅުތައް އަޅާފައިވެއެވެ.
މިއާއެކު އުފެދޭ ސުވާލަކީ ރާއްޖެއަށް މި ބަލި އައުމުގެ ފުރުސަތު އޮތީ ކިހާވަރަކަށް ތޯއެވެ؟ އަދި އިނގިރޭސިވިލާތުން ފެނުނު ކޮވިޑުގެ އާ ސްޓްރެއިން ރާއްޖެއަށް ފޯރައިފިނަމަ ރާއްޖެ ދެވަނަ ލޮކްޑައުންއަކަށް ދާނެތޯ، މީވެސް އުފެދޭ ބޮޑު ސުވާލެކެވެ.
ގައިމުވެސް ދެވަނަ ލޮކްޑައުން އަކަށް ދިއުމަކީ އެކަކުވެސް އެދޭނެ ކަމެއް ނޫނެވެ. އަދި ދެވަނަ ލޮކްޑައުންއަކަށް ދިއުމަކީ ފަތުރުވެރިކަމަށް ބަރޯސާވެފައިވާ ދިވެހިންގެ އިގްތިސާދު ފުނޑުފުނޑު ވެދާނެ ކަމެކެވެ. ދިވެހިން އަދިވެސް މި މަސައްކަތް ކުރަނީ މާޗް މަހު ރާއްޖެ ލޮކްޑައުންއަށް ދިއުމާއި ގުޅިގެން ރާއްޖޭގެ އިގްތިސާދަށް އެރި ލޮޅުންގަނޑު ހަމައަކަށް އެޅުވޭތޯއެވެ. މިފަދަކަމެއް ތަކުރާރު ވެއްޖެނަމަ ގައުމު އިނދަ ޖެހުމަކީވެސް ހަމަ ވުން އެކަށީގެންވާ ކަމެކެވެ.
ރާއްޖޭގައި ކޮވިޑް 19ގެ ހާލަތު މަޑުމަޑުން ހަމައަކަށް އެޅެމުން އަންނައިރު، ކާފިއު އުވާލުން ފަދަ ބޮޑެތި ލުއިތަކެއް ދިންތާ އަދި ހަފްތާއެއް ނުވެއެވެ. ނަމަވެސް އެޗްޕީއޭއިން އަދިވެސް އަންނަނީ މިހާރުވެސް އަޅާފައިވާ ފިޔަވަޅުތަކާ އެއްގޮތަށް އަމަލު ކުރުމަށް ތަކުރާރުކޮށް އިރުޝާދު ދެމުންނެވެ. އަދި ކޮވިޑްގެ ހާލަތު ނިމުމަކަށް ނާންނަކަމަށާޢި، ރައްކާތެރިކަމުގެ ފިޔަވަޅުތަކަށް އަމަލު ކުރުމަށް އެޗްޕީއޭއާއި ކަމާބެހޭ ފަރާތްތަކުން އަންނަނީ ތަކުރާރުކޮށް ނަސޭހަތްތެރި ވަމުންނެވެ.
މިއީ ފަރުދީ ޒިންމާ އަދާކޮށް، މި ބަލި އިތުރަށް ފެތުރުނަ ނުދިނުމަށް މަސައްކަތް ކުރަންވީ ވަގުތެވެ. ކަން ފަސޭހަ ކޮށްފި ނަމަ ނުކުންނާނެ ނަތީޖާވެސް މި ޖުލައި މަހު ދިވެހިންނަށް ވަނީ ފެނިފައެވެ. ދެން އޮތީ އެންމެން ގުޅިގެން، ގައުމުގައި އިތުރަށް މި ބަލި ފެތުރުނަ ނުދިނުމަށް މަސައްކަތް ކުތުމެވެ. މިކަން އޮތީ އާންމުންގެ އަތް މަތީގައެވެ.
