ފަތުރުވެރިންނަށް ހިދުމަތް ދިނުމަށް 501 ތަނަކަށް އަލުން ހުއްދަ ދީފައިވާ އިރު، އޭގެ ތެރޭގައި ހިމެނެނީ 139 ރިސޯޓަކާއި، ދިހަ ހޮޓެލަކާއި، 130 ސަފާރީގެ އިތުރުން 222 ގެސްޓްހައުސްތަކެވެ. އެއާއި އެކު ފަތުރުވެރިންނަށް ހިދުމަތް ދިނުމަށް 40،363 އެނދު މިހާތަނަށް ވަނީ ހުޅުވާފައެވެ.
މި މަސް ނިމޭކޮޅު މިނިސްޓްރީން އިތުރު ދެ ރިސޯޓެއް ހުޅުވުމުގެ ހުއްދަ ދޫކުރާނެ ކަމަށް ބެލެވޭ އިރު، އެއާއި އެކު 256 އެނދު ފަތުރުވެރިންނަށް ހުޅުވައިލެވިގެންދާނެ އެވެ.
ބޯޑަރު ހުޅުވިފަހުން އެންމެ ފުރަތަމަ ހުއްދަ ދޫކުރަން ފެށީ ރިސޯޓްތަކަށް ކަމަށްވާ އިރު، އޭގެ ތިން މަސްދުވަސް ފަހުން ގެސްޓްހައުސްތަކަށް ހުއްދަ ދޫކުރަން ފަށާފައިވެ އެވެ. ގާތްގަނޑަކަށް ފަތުރުވެރިންނަށް ހިދުމަތްދޭ ހުރިހާ ތަނެއް މިހާރު ވަނީ ހުޅުވާފައެވެ.
ބޯޑަރު ހުޅުވިފަހުން ފަތުރުވެރިންނަށް ހިދުމަތްދޭ ތަންތަން އާ އާންމު ހާލަތުގައި ހުޅުވުމަށް ޓޫރިޒަމް މިނިސްޓްރީން ހުއްދަ ދޫކުރަމުން އަންނަނީ ހުއްދައަށް އެދޭ ތަނަކުން ހުށަހަޅާ އެސްއޯޕީއަށް ބެލުމަށް ފަހުގައެވެ. އާ އާންމު ހާލަތުގައި އަމަލުކުރާނެ އުސޫލުތަކެއް ވެސް މިނިސްޓްރީން ކަނޑައަޅާފައިވާ އިރު، އެ އުސޫލުތަކަށް އަމަލުނުކުރާ ތަންތަނަށް ދީފައިވާ ހުއްދަ ބާތިލްކުރުމުގެ ބާރު މިނިސްޓްރީ އަށް ދީފައިވެ އެވެ.
