އެއްބައިވަންތަކަމުގެ ދުވުމުގެ ނަމުގައި ބޭއްވި މި ދުވުން އޮތީ އެއް ކިލޯމީޓަރު، ތިން ކިލޯ މީޓަރު އަދި ފަސް ކިލޯމީޓަރު ކެޓަގަރީންނެވެ. އެއް ކިލޯމީޓަރުގެ ކެޓެގަރީ ހާއްސަކޮށްފައިވަނީ މައިގަނޑު ގޮތެއްގައި ތުއްތު ކުދިންނަށެވެ. މި ކެޓަގަރީގައި ބައިވެރިވި ކޮންމެ ތުއްތު ކުއްޖަކަށް ނިލަންދޫ ޔަންގް ޖެނެރޭޝަން- އެންވައިޖީގެ ފަރާތުން ހަދިޔާއެއް ދީފައިވެއެވެ. އެހެން ކެޓަގަރީތަކުން ވަނަ ހޯދި ފަރާތްތަކަށް އިނާމް ދީފައިވެއެވެ. ދުވުމުގައި ބައިވެރިވި ހުރިހާ ފަރާތްތަކަށްވެސް މެޑަލް ދީފައިވެއެވެ.
އެއްބައިވަންތަކަމުގެ ދުވަސް ފާހަގަ ކުރުމުގެ ގޮތުން ނިލަންދޫގައި މި ދުވުން ބޭއްވި އިރު، މާލޭގައި ވަރޗުއަލްކޮށް ބައިވެރިވުމަށް ހުޅުވާލި ފުރުސަތުގައި މާލޭގައިވެސް ބައެއް ބައިވެރިން މި ދުވުން ފުރިހަމަ ކުރިއެވެ. މާލޭގައި އަދި ނިލަންދޫގައި ވެސް މި ދުވުމުގައި ބައިވެރިވި ފަރާތްތަކުގެ ތެރޭގައި ގިނަ އަދެއްގެ ތުއްތު ކުދިން ހިމެނެ އެވެ.
