ކާނިވާ ސަރަހައްދުގައި ރޭ އިދިކޮޅު ކޯލިޝަނުން ބޭއްވި "ވިސްނާ" ޖަލްސާގައި ވާހަކަ ދައްކަވަމުން، އަބްދުއްރަހީމް ވިދާޅުވީ ރައީސް ޔާމީން ޖަލުގައި އޮންނަވާތާ މިދިޔަ ނޮވެމްބަރު މަހުގެ 28 ވަނަ ދުވަހު، އެއް އަހަރުވެގެންދިޔައިރު އެ ދުވަހު ވަނީ އެމަނިކުފާނާ ވާހަކަ ދެއްކެވެމުގެ ފުރުސަތު ލިބިގެންގޮސްފައި ކަމަށެވެ. 

އެގޮތުން ވާހަކަ ދައްކަވަމުން، އެމަނިކުފާނުގެ ބޭސް ފަރުވާގެ ކަންކަމާއި ގުޅޭގޮތުން ވާހަކަ ދައްކަވަން ފެއްޓެވުމާއެކު ވަނީ ވާހަކަ ހުއްޓުވާއި، ވިދާޅުވީ "ތިމަންނައަކީ ގައުމު ދޫކޮށްފަ ފިލައިގެންދާނެ މީހެއް ނޫނޭ،" ކަމަށެވެ. އަދި އެމަނިކުފާނަށް ޖަލުގައި ހުންނަވަން ޖެހުނަސް ހުންނެވީ ވަރަށް ސާބިތުކަމާއެކު ކަމަށް ރައްޔިތުންނަށް ދެންނެވުމަށް ވެސް ރައީސް ޔާމީން ވިދާޅުވި ކަމަށް އަބްދުއްރަހީމް ވިދާޅުވެ އެވެ. 

އޭގެ އިތުރުން، ޖަލްސާގައި ވާހަކަ ދައްކަވަމުން އަބްދުއްރަހީމް ވަނީ ސަރުކާރުގެ ކަންކަން ހުރި ގޮތުން ވެސް ފާޑުވިދާޅުވެ ވާހަކަ ދައްކަވާފަ އެވެ. އެގޮތުން މަސްވެރިންނާއި ޒުވާނުންނާއި މެދު ސަރުކާރުން އަމަލުކުރަމުން އަންނަ ގޮތާއި މެދު ހިތްހަމަޖެހިވަޑައި ނުގަނަވާ ވާހަކަ ދެއްކެވި އެވެ.