އެގޮތުން 26 ވަނަ އުފަން ދުވަހު ފެނިގެން މިދިޔައީ ދުނިޔޭގެ އެންމެ އުސް އިމާރާތް، ބުރިޖް ހަލީފާ، ވީގެ ތަސްވީރުތަކާއެކު ދިއްލާލި މަންޒަރެވެ. މިއީ ބީޓީއެސްގެ ލަވަކިޔުންތެރިއެއް ފޮޓޯ އިން މި އިމާރާތް ދިއްލާލި ފުރަތަމަ ފަހަރެވެ.
އޭގެ އިތުރަށް ވެސް ވީގެ އެންމެ ސަޅި މޮމެންޓްސްތައް ދައްކުވައިދޭ ވީޑިއޯއެއް ވެސް ވަނީ ދައްކާލާފަ އެވެ.
މީގެ ކުރިން ވަނީ ބޮލީވުޑުގެ މަޝްހޫރު ތަރި، ޝާހްރުކް ހާން ފަދަ ތަރިންގެ އުފަން ދުވަހު ވެސް މިގޮތަށް ދުވަހުގެ ތަހުނިޔާ ކިޔާފަ އެވެ.
ވީ ވަނީ އެންމެ ދެ ހޭޝްޓެގާއެކު ތާރީހުގެ ތެރެެއަށް ކުރިން ވެސް ވަދެފަ އެވެ. އެގޮތުން ޓިކްޓޮކް މެދުވެރިކޮށް ވީގެ ދެ ހޭޝްޓެގަށް ވަނީ ދިހަ ބިލިއަނަށް ވުރެ ގިނަ ވިއުސް ލިބިފަ އެވެ.
އޭނާގެ ހޭޝްޓެގަކީ "ވީ" އާއި "ތައެހްޔަންގް" އެވެ. އެ ދެ ހޭޝްޓެގަށް ވެސް ދިހަ ބިލިއަނަށް ވުރެ ގިނަ ވިއުސް ލިބި ވީ ވެފައި މިވަނީ ދުނިޔެއިން އެ ކާމިޔާބީއަށް ވާސިލުވި ފުރަތަމަ އާޓިސްޓަށެވެ.
އާންމުންގެ މެދުގައި ވީ މަގްބޫލުވީ "ބީޓީއެސް" އިންނެވެ. ބީޓީއެސްއަކީ ސައުތުކޮރެއާގެ ހަތް ފިރިހެން ކުއްޖެއްގެ މައްޗަށް އެކުލެވިގެންވާ ގްރޫޕެކެވެ. 2013 ވަނަ އަހަރު އެ ގްރޫޕް އުފެދިގެން އައިއިރު އޭރުއްސުރެ ގިނަ ބައެއްގެ މެދުގައި މަގްބޫލުކަން އައީ ހޯދަމުންނެވެ.
ވީގެ އިތުރުން ވެސް އެ ގްރޫޕުގައި ހިމެނޭ އެހެން ތަރިންނަށް ވެސް މަގްބޫލުކަން ބޮޑެވެ.
