މި އަހަރުގެ ލީގާ ޔުނައިޓެޑް ވިކްޓްރީން ކުރިމަތިލީ އިރު އެ ޓީމުގެ ކޯޗު މުހައްމަދު އާދަމްގެ ޓާގެޓެއް ކަމަށް ކަނޑައަޅާފައިވަނީ ލީގު ޗެމްޕިއަންކަން ހޯދުމެވެ. އެހެންނަމަވެސް ލީގުގެ ހަތަރު މެޗު ކުޅުނު އިރު އަދި އެ ޓީމަށް ލިބިފައިވަނީ އެންމެ ދެ ޕޮއިންޓެވެ. ފުރަތަމަ ދެ މެޗުން ބޮޑު ތަފާތަކުން ބަލިވިއިރު ފަހު ދެ މެޗުން އެއްވަރު ވެގެން ދެ ޕޮއިންޓް ލިބުނީއެވެ.
މިދިޔަ ސީޒަން ހަތްވަނައިގައި އޮވެ ނިންމާލި ޔުނައިޓެޑް ވިކްޓަރީގެ ކޯޗު މުހައްމަދު އާދަމް، ސީޒަން ފެށުމުގެ ކުރިން ބުނެފައިވަނީ ޔޫވީން ނުކުންނަނީ ލީގު ކާމިޔާބު ކުރުމުގެ އަޒުމުގައި ކަމަށެވެ.
ދިވެހި ލީގުގެ މި އަހަރުގެ މުބާރާތުން ޔުނައިޓެޑް ވިކްޓްރީއަށް ފުރުސަތު ދީފައިވަނީ ޔުނައިޓެޑް ވިކްޓަރީއަށް ވުރެ މަތިން އެންމެ ފަހުން ލީގުގައި ވާދަކުރި ފޯކައިދޫ މުބާރާތުން ބާކީ ކުރަން އެފްއޭއެމްގެ އެކްސްކޯއިން ނިންމުމަށް ފަހުއެވެ. މިދިޔަ ލީގަށް ފަހު އެފްއޭއެމުން ނިންމީ އަތޮޅުތަކުން އައިސްފައިވާ ޓީމުތަކަށް ދިވެހި ލީގުން ފުރުސަތު ނުދޭށެވެ. މި ނިންމުމާއި އެކު ޔޫވީއަށްވުރެ ރަނގަޅު ނަތީޖާ ހޯދާފައިވާ ފޯކައިދޫ ލީގުން ބާކީކުރިއެވެ.
ހޯމަ ދުވަހުގެ ރޭގެ މެޗުގައި ޔޫވީން ފަހު ވަގުތު ޓީސީއާ އެއްވަރުވީ ޔޫވީން ލަނޑެއް ޖަހައި ކުރިވެސް ހޯދާފައި ވަނިކޮށެވެ. ދެވަނަ ހާފުގެ ތެރޭގައި ޔޫވީއަށް ގޯލް ޖަހައިދިނީ ބިދޭސީ ކުޅުންތެރިޔާ އަޒިނިއަޒޯފް މަރަޓްއެވެ. ޓީސީން އެއްވަރުކުރީ މެޗުގެ ފަހު ވަގުތުގައި އަޖުފާން މުހައްމަދު ޖެހި ގޯލުންނެވެ.
