ޑރ. ޝަހީދު މިހެން ވިދާޅުވެފައިވަނީ ޑިމޮކްރަސީގެ ދައުރުގައި ދިވެހިރާއްޖެ މާ ބޮޑަށް ވެސް ފައްކާވެއްޖެ ކަމަށް ވިދާޅުވެ، ރާއްޖެ އޮތީ ޑިމޮކްރަސީގައި އެމެރިކާ އަށް ވުރެ ވެސް ކުރީގައިކަން ދޭހަވާ ފަދަ މޭރުމަކުން އިލެކްޝަންސް ކޮމިޝަންގެ މެމްބަރު އިސްމާއިލް ހަބީބް ކުރެއްވި ޓުވީޓަކަށް ޖަވާބު ދެއްވަމުންނެވެ.
އެގޮތުން ޑިމޮކްރަސީއަކީ ހަމައެކަނި ވޯޓު ލުމެއް ނޫން ކަމަށާއި، އެއީ ޕާޓީ އުފެއްދުމެއްވެސް ނޫން ކަމަށް ޑރ. ޝަހީދު ވިދާޅުވިއެވެ. އަދި ރޫލް އޮފް ލޯގެ އިތުރުން އަސާސީ ހައްގުތައް ހިމާޔަތް ނުކުރެވޭ ގައުމަކީ ޑިމޮކްރަސީ އެއް ނޫން ކަމަށް ޑރ. ޝަހީދު ވިދާޅުވިއެވެ.
އެ ޓުވީޓަށް ޖަވާބު ދެއްވަމުން ހަބީބް ވަނީ ޝަހީދުގެ ހިޔާލަށް ވަރަށް ބޮޑަށް އިހުތިރާމް ކުރައްވާ ކަމަށް ވިދާޅުވެފައެވެ.
ހަބީބް އިއްޔެ ކުރެއް ޓުވީޓަކީ އެމެރިކާގައި ހިނގައިގެން އުޅޭ ހަމަނުޖެހުންތަކަށް އަމާޒުކޮށް ކޮށްފައިވާ ޓުވީޓެކެވެ. އެގޮތުން އެމެރިކާގެ ރައީސް ޑޮނަލްޑް ޓްރަމްޕްގެ ސަޕޯޓަރުން ވަނީ އެގައުމުގެ ކޮންގްރެސް ބައްދަލުވުންތައް ބާއްވާ ކެޕިޓޮލް އިމާރާތަށް ވަދެގަނެ އެތަނުގައި ހަމަނުޖެހުން ހިންގާފައެވެ.
