ރޭ ބޭއްވި ހާއްސަ ރަސްމިއްޔާތެއްގައި އައިބީއެމްގެ އާ ފިހާރަ ހުޅުވައިދެއްވީ ހުޅުމާލޭ ދާއިރާގެ މަޖިލިސް މެމްބަރު އަލީ ނިޔާޒެވެ. އަލީ ނިޔާޒުގެ އިތުރުން އެ ރަސްމިއްޔާތުގައި އައިބީއެމްގެ މެނޭޖިން ޑިރެކްޓަރު އިބްރާހީމް އަންވަރު ވެސް ބައިވެރިވެވަޑައިގަތެވެ.
ރަސްމިއްޔާތުގައި ވާހަކަ ދައްކަވަމުން މެމްބަރު އަލީ ނިޔާޒު ވިދާޅުވީ މީގެ ކުރިން ހުޅުމާލެ ވެފައި ވަނީ ދުވަހު މަސައްކަތަށް ފަހު މީހުން ނިދަން އަންނަ ރަށެއްގެ ގޮތުގައި ކަމަށާއި، ނަމަވެސް ހާލަތު ބަދަލުވެ، މާލޭ ސަރަހައްދުގައި އެންމެ ހަލުވި މިނެއްގައި ތަރައްގީ ވަމުން އަންނަނީ ހުޅުމާލެ ކަމަށް ނިޔާޒު ފާހަގަކުރެއްވި އެވެ.
އަދި ކުރިއަށް އޮތް ތަނުގައި އައިބީއެމުން ޕްލާސްޓިކް ދޫކޮށްލައި، ތިމާވެއްޓާއި ރައްޓެހި އުފެއްދުންތައް ފަރުމާކުރާނެ ކަމަށް އުންމީދު ކުރައްވާ ކަމަށް ވެސް ނިޔާޒު ވިދާޅުވި އެވެ.
އައިބީއެމްގެ މެނޭޖިން ޑިރެކްޓަރު އިބްރާހީމް އަންވަރު ވިދާޅުވީ ކޮވިޑް-19 ގެ ސަބަބުން ވޭތުވެދިޔަ އަހަރުގައި ކުންފުންޏަށް ބޮޑެތި ދަތިތަކެއް ކުރިމަތިވެފައިވީ ނަމަވެސް، 2019 ވަނަ އަހަރަށް ވުރެ 2020 ވަނަ އަހަރު ނިންމާލީ ކާމިޔާބު އަހަރެއްގެ ގޮތުގައި ކަމަށެވެ. އަދި ކޮވިޑް-19 ގެ ފުރަބަންދުގެ ތެރޭގައި މެދުކެނޑުމެއް ނެތި އެ ކުންފުނީގެ މުވައްޒަފުން ވެފައިވާ ގުރުބާނީ ފާހަގަކޮށް ޝުކުރު ދަންނަވާފައިވެ އެވެ.
އަންނަ އަހަރު އައިބީއެމްގެ އަމާޒަކަށް ވާނީ ތިމާވެއްޓާއި ރައްޓެހި ފެނުގެ އުފެއްދުންތައް ރައްޔިތުންނަށް ފޯރުކޮށްދިނުން ކަމަށާއި، އެގޮތުން ގިނަ ދުވަހު ބޭނުންކުރެވޭ 18 ލީޓަރުގެ ފެން ހަމާއި، އެއް ލީޓަރުގެ ބިއްލޫރި ފެން ފުޅި ބާޒާރަށް ނެރުމުގެ މަސައްކަތް ފެށޭނެ ކަމަށް އެކުންފުނިން ވަނީ ބުނެފަ އެވެ.
މީގެ އިތުރުން އައިބީއެމަކީ ހަމައެކަނި ފެން އުފައްދާ ކުންފުންޏެއްގެ ގޮތުގައި އޮތް އޮތުން ނިމުމަކަށް ގެނެސް، އަންނަ އަހަރު އެހެން އުފެއްދުންތައް ބާޒާރަށް ގެނައުމުގެ މަސައްކަތް ވެސް ފެށޭނެ ކަމަށް އެ ކުންފުނިން ވަނީ ބުނެފަ އެވެ.
