Advertisement

ވާރޭވެހޭ ދުވަސްތަކުގައި މެމްބަރުން އޮފީހަށް ވަޑައިގަތުމަށް ކާރެއް ބޭނުންވާ ކަމަށް ވަޒީފާ އާއި ބެހޭ ޓްރައިބިއުނަލްގެ ރައީސް މުހައްމަދު ޒާހިރު ރައްޔިތުންގެ މަޖިލީހުގެ ބަޖެޓް ކޮމިޓީގައި ވިދާޅުވީ ޓްރައިބިއުނަލްގެ މެމްބަރުންނާއި މަޝްވަރާ ނުކޮށްކަން ހާމަވެއްޖެއެވެ.

ވަޒީފާއާ ބެހޭ ޓްރައިބިއުނަލްގެ ފަރާތުން މިފަދައިން ހާމަކޮށް ބަޔާނެއް ނެރެފައިވަނީ، ވަޒީފާ އާއި ބެހޭ ޓްރައިބިއުނަލް ގެ ރައީސް މަޖިލީހުގެ ބަޖެޓް ކޮމިޓީގައި ކާރެއް ބޭނުންވާކަމަށް ވިދާޅުވެ ދެއްކެވި ވާހަކަ ތަކަށް ގިނަބަޔަކު ފާޑުކިޔަން ފެށިމާއި ގުޅިގެންނެވެ.

އެގޮތުން ޓްރައިބިއުނަލްގެ ރައީސް ޒާހިރު ފިޔަވާ ދެންތިއްބެވި މެމްބަރުން ސޮއި ކުރައްވާ ނެރުނު ބަޔާނުގައި ބުނެފައިވަނީ، ޒާހިރުގެ ވާހަކަ ތަކަކީ އެ މެމްބަރުންނާ މަޝްވަރާކޮށްގެން ނުވަތަ މެމްބަރުން އެދިގެން ދެއްކެވި ވާހަކައެއް ނޫން ކަމަށެވެ.

"އަދި މެމްބަރުން ވަޒީފާގެ މައްސޫލިޔަތު އަދާކުރުމަށްޓަކައި ކާރެއް ނުވަތަ އެހެންވެސް އުޅަނދެއް ބޭނުންވާ ކަމުގެ ޝަކުވާއެއް އެއްވެސް މެންބަރެްގެ ފަރާތުން ވަޒީފާއާބެހޭ ޓްރައިބިއުނަލްގެ ރައީސަށް ނުވަތަ ދައުލަތުގެ އެއްވެސް އިދާރާއަކަށްވެސް އުފުލާފައިނުވާނެ ކަމުގައި ދަންނަވަމެވެ." ޓްރައިބިއުނަލުން ނެރުނު ބަޔާނުގައި ވެއެވެ.

އަދި އެބަޔާނުގައި ބުނެފައިވަނީ، ޓްރައިބިއުނަލްގެ ރައީސް މަޖިލީހުގެ ކޮމިޓީގައި ދެއްކެވި ވާހަކަތަކަކީ އެބޭފުޅާ ފަރުދީ ހައިސިއްޔަތުން ދެއްކެވި ވާހަކަފުޅުތަކެއްކަމަށާއި، އެވާހަކަފުޅުތަކަކީ ވަޒީފާއާ ބެހޭ ޓްރައިބިއުނަލްގެ އެހެން މެމްބަރުން ޤާނޫނީ ގޮތުން ޒިންމާ އުފުލަންޖެހޭ ވާހަކަތަކެއް ނޫންކަމަށެވެ.

ޓްރައިބިއުނަލްގެ ބަޔާނުގައި އިތުރަށް ބުނެފައިވަނީ އަންނަ އަހަރަށް އެ އޮފީހުގެ ބަޖެޓު އެކުލަވާލާފައިވަނީ ފިނޭންސް މިނިސްޓްރީގެ ލަފަޔާއި ޓްރައިބިއުނަލުން އެކުލަވާލާފައިވާ ތަސައްވަރާވެސް އެއްގޮތަށް ކަމަށެވެ.