އިންސްޓަގްރާމުގައި ނިކް ޕޯސްޓުކުރި ވީޑިއޯއަކުން ފެނިގެން ދަނީ އޭނާގެ ޕްރައިވެޓު ތިއޭޓަރުގައި ފިލްމު ބަލަން އުޅެނިކޮށެވެ. ވީޑިއޯގައި ނިކް ވަނީ ޕްރިޔަންކާގެ އެކްޓިންއަށް ވަރަށް ތައުރީފުކޮށްފަ އެވެ. އަދި މި ފިލްމަކީ "އަންރިއެލް" ނުވަތަ ގަބޫލުކުރަން ދަތިވާހާ މޮޅު ފިލްމެއް ކަމަށާއި ޕްރިޔަންކާގެ އެކްޓިން "އާދަޔާ ހިލާފަށް މޮޅު" ކަމަށް ބުނެފައި ވެއެވެ.
ޕްރިޔަންކާ އިއްޔެ އޭނާގެ އިންސްޓަގްރާމް ސްޓޯރީގައި ބުނެފައި ފިލްމުގެ ވާޗުއަލް ޕްރެސް ޓުއާ ލަންޑަނުން ފަށައިފި ކަމަށެވެ. އަދި ފިލްމު ޕްރޮމޯޓު ކުރަން މީޑިއާ އާއެކު ބޭއްވި ބައްދަލުވުންތަކުގެ ބައެއް ފޮޓޯތައް އޭނާ ވަނީ ސޯޝަލް މީޑިއާގައި ހިއްސާކޮށްފަ އެވެ.
މި ފިލްމު މުޅިން އަލަށް ފެނިގެންދާ އަދާޝްއަށް ވަނީ ގިނަ ބައެއްގެ ސަމާލުކަން އަމާޒުވެފަ އެވެ. އެގޮތުން ޓްރެއިލާ ބެލި ގިނަ މީހުން ވެސް ދައްކަނީ އޭނާގެ ވާހަކަ އެވެ. އަދާޝްއާ ބެހޭ ގޮތުން ޕްރިޔަންކާ ބުނީ އެއީ ހުނަރުވެރި ޒުވާނެއް ކަމަށާއި ފިލްމުގެ ތަރިއަކީ އޭނާ ކަމަށެވެ.
"ދަ ވައިޓް ޓައިގާ" ރިލީޒްކުރަން ހަމަޖެހިފައި ވަނީ ޖެނުއަރީ 22 ވަނަ ދުވަހު ނެޓްފްލިކްސް ގައެވެ.
