މިފަހަރު އޭނާ ޗުއްޓީ ހޭދަކުރަމުން އަންނަނީ ދ. އަތޮޅުގައި އޮންނަ ވޮއްމުލި ރިސޯޓުގަ އެވެ. އިއްޔެ ހަވީރެއް ހާއިރު ރާއްޖެއަށް އައި ގޮތަށް ސާރާ ވަނީ އޭނާގެ ސަޕޯޓަރުންނަށް ރާއްޖޭގައި ނަގާފައިވާ ފޮޓޯތަކެއް ހިއްސާކޮށްފަ އެވެ.
މިދިޔަ އަހަރު ވެސް ސާރާ ވަނީ ރާއްޖެއަށް އައިސްފަ އެވެ. އެފަހަރު އައީ ކޮއްކޮ އިބްރާހީމް އާއި މަންމަ، އަމްރީތާއާ ވެސް އެކުގަ އެވެ. އެހެންނަމަވެސް މިފަހަރު އައީ ކޮން ބަޔަކާ އެކުގައިކަން ސާފު ނުވާއިރު އެއިން މީހެއްގެ ފޮޓޯއެއް ވެސް އަދި ހިއްސާއެއް ނުކުރެ އެވެ.
އެންމެ ފަހުން ސާރާ ފެނުނީ ވަރުން ދާވަންއާއެކު ކޫލީ ނަމްބަރު ވަން އިންނެވެ. އެ ފިލްމަށް ހީކުރިވަރުގެ ރަނގަޅު ކާމިޔާބީއެއް ލިބިފައެއް ނުވެ އެވެ. ކެދާނަތާއި ސިމްބާއިން ވެސް ފެނިގެންދިޔަ ސާރާގެ ކުރިއަށް އޮތް ފިލްމަކީ އަތްރަންގީ ރޭ އެވެ. އެއީ އަކްޝޭ ކުމާރާއި ދަނުޝްއާއެކު އޭނާ ފެނިގެންދާނެ ފިލްމެކެވެ. ފިލްމުގެ ޝޫޓިންތައް މިހާރު ވަނީ ފަށާފަ އެވެ.
