ހިކިމަސް ބޭރު ކުރެވޭނެ ގޮތެއް ނެތި ދިވެހި މަސްވެރި އާއިލާތައް ބިކަވަމުންދާ މައްސަލައިގެ އެ ޕާޓީން މީގެ ކުރިން ވެސް އެތައް ފަހަރެއްގެ މަތިން ކަންބޮޑުވުން ފާޅުކޮށްފައި ވެއެވެ.
އެ ޕާޓީން މިއަދު ކުރި ޓްވީޓެއްގައި ބުނީ ހިކިމަސް ބޭރު ކުރުން އެއްކޮށް ހުއްޓި، މުޅި އާއިލާ ބައިވެރިވެގެން ކުރާ މަސައްކަތް ހުއްޓި، މެދު އަދި އުތުރު ރަށްރަށުގައި އެތައް ޓަނެއްގެ ހިކިމަސް ހަލާކުވަމުންދާ ކަމަށެވެ.
"ސަރުކާރުން އަވަސް ހައްލެއް ހޯދައިދޭން ޖެހޭ. މަސް ބޭރު ކުރެވޭނެ ސިލޯނު ނޫން އެހެން މާކެޓެއް ހޯދާ، އެދެވޭ ހައްލެއް ހޯދާ ނުދެވޭ ނަމަ އެ މަސައްކަތް ކުރުން ހުއްޓާލަން މަސްވެރިންނަށް އަންގާ، އާމްދަނީ ހޯދޭނެ އެހެން މަސައްކަތެއް ކުރެވޭނެ މަގުފަހިކޮށްދޭން ޖެހޭ!،" އެ ޕާޓީން ބުންޏެވެ.
ދިވެހި ކަނޑުމަހުގެ ބާވަތްތައް ސްރީލަންކާއަށް އެތެރެކުރުން މަނާކޮށްފައިވާ ކަމަށް މީޑިއާތަކުގައި މިދިޔަ އަހަރު ވަނީ ހަބަރު ފަތުރާފަ އެވެ. ނަމަވެސް ފޮރިން މިނިސްޓްރީން ބުނީ އެކަމުގެ އެއްވެސް މައުލޫމާތެއް ސްރީލަންކާ ސަރުކާރުން ދިވެހި ސަރުކާރާ ހިއްސާކޮށްފައި ނުވާ ކަމަށެވެ.
ރާއްޖޭގެ ކަނޑު މަހުގެ ބާވަތްތައް އެއްވެސް ހުރަހެއް ނެތި ސްރީލަންކާއަށް އެތެރެ ކުރެވޭނެ ކަމުގެ ޔަގީންކަން ދިވެހި ސަރުކާރަށް އޮކްޓޯބަރު މަހުގެ 27 ވަނަ ދުވަހު ދީފަައިވާ ކަމަށް ވެސް ފޮރިން މިނިސްޓްރީން ބުނެ އެވެ.
ފޮރިން މިނިސްޓްރީން އެހެން ބުނި ނަމަވެސް ލަންކާގެ އާ ޓެކުހުގެ ރޭޓުތަކާއި އެކު ރާއްޖެއިން ލަންކާއަށް އެކްސްޕޯޓު ކުރާ ކަނޑުމަހުގެ ބާވަތްތަކުން ނަގާ ޓެކުހުގެ ރޭޓު ވަނީ ބޮޑުކޮށްފަ އެވެ.
