މި ހަމަލާގައި އުމުރުން 17 އަހަރުގެ އަހުމަދު އުދައްޔު ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް އެ ރަށު ސިއްހީ މަރުކަޒުން ވަނީ ބުނެފައެވެ.
އުދައްޔުގެ ބޭބެއަށް އެރަށު ސިއްހީ މަރުކަޒުގައި ފަރުވާ ދިނުމަށް ފަހު މިހާރު ވަނީ ތިނަދޫގައި ހުންނަ ޑރ. އަބްދުއް ސަމަދު މެމޯރިއަލް ހޮސްޕިޓަލަށް ގެންގޮސްފައެވެ.
އުދައްޔުގެ ބޭބެ ހޮސްޕިޓަލަށް ގެންދިޔައީ އޭނާ ގެންދިޔަތާ ގަޑީރެއްހާ ފަހުންނެވެ.
ބޭބެގެ ހާލު ވެސް ސީރިއަސް އެވެ.
މި ހަމަލާއާ ގުޅިގެން ތިން މީހަކު ފުލުހުން ވަނީ ހައްޔަރުކޮށްފައެވެ.
ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެފައިވަނީ، މި މައްސަލައިގައި ފުލުހުންގެ އޮގަނައިޒްޑް ކްރައިމް ޔުނިޓުގެ ޓީމެއް އެ ރަށަށް މިއަދު ހެނދުނު ދާނެ ކަމަށެވެ.
ރޭ މާރާމާރީގައި މަރުވި އުދައްޔުގެ ބުރަކަށީގެ އެކި ތަންތަނަށް ވަޅިން ހަމަލާދީފައިވެއެވެ. އަދި ފަސްވަރަކަށް އިންޗި ފުނަށް ވަޅި ހަރާ ޒަހަމްކޮށްލާފައިވާ ނިޝާންތައް ވެސް ހުއްޓެވެ. ފުރަގަހުން ވަޅި ހަރާފައިވަނީ ފުއްޕާމެޔާ ހިތާ ދިމާލުންކަމަށް މައުލޫމާތު ލިބެއެވެ.
