މައުލޫމާތު ލިބިފައިވާ ގޮތުގައި ތިން ކުޅުންތެރިންގެ ތެރެއިން ދެ ކުޅުންތެރިއަކު ތިބީ ކޮވިޑް ފެސިލިޓީއެއްގައެވެ. އަނެއް ކުޅުންތެރިޔާ ހުރީ ހޯމް ކަރަންޓީނުގައި ކަމަށް މައުލޫމާތު ލިބިފައިވެއެވެ. ޔުނައިޓެޑް ވިކްޓަރީގެ ތިން ކުޅުންތެރިންގެ އިތުރުން ދިވެހި ލީގުގައި ވާދަކުރާ ކުލަބެއްގެ ހެޑް ކޯޗުވެސް އައިސޮލޭޓްކޮށްފައިވާ ކަމަށް މައުލޫމާތު ލިބިފައިވެއެވެ.
ޔުނައިޓެޑް ވިކްޓަރީގެ ތިން ކުޅުންތެރިން ކޮވިޑަށް ޕޮޒިޓިވްވެފައިވާއިރު، އެޗްޕީއޭއިން މި ފަހުން އެޅި ރައްކާތެރިކަމުގެ ފިޔަވަޅުތަކާއި އެކު ދިވެހި ލީގުގެ ކުޅުންވަނީ މެދު ކަނޑާލާފައެވެ. ލީގުގެ ކުޅުން އަލުން ފެށުމަށް ކްލަބުތަކުން އަދި އެފްއޭއެމުން އަންނަނީ ޕްރެޝަރު ކުރަމުންނެވެ.
ކޮވިޑާ ގުޅިގެން ދިވެހި ލީގުގެ ކުޅުން މެދުކަނޑާލީ މިދިޔަ ހަފުތާ ތެރޭގައެވެ. މެދުކަނޑާލަން ޖެހުނީ އެޗްޕީއޭއިން އާއްމު ކުރި އުސޫލުގައިވާ ގޮތުން އެކަނި ކުރާ ކަސްރަތުތައް ފިޔަވައި، ކުޅިވަރު ހަރަކާތްތަކާއި ކަސްރަތު ހަރަކާތްތައް ހުއްޓާލަން ޖެހުމުންނެވެ. އެޗްޕީއޭއިން އުސޫލުތައް ހަރުކަށި ކުރަން ޖެހުނީ މާލެ ސަރަހައްދުގައި ކޮވިޑަށް ޕޮޒިޓިވްވީ މީހުންގެ އަދަދު ދުވާލެއްގެ މައްޗަށް ސަތޭކައަށްވުރެ އިތުރު ވެގެން ދިޔުމުންނެވެ.
