Advertisement

މާލޭ ސިޓީގެ ސްކޫލުތަކަށް ދިމާވެފައިވާ ޖާގައިގެ ދަތިކަން ހައްލުކުރުމަށްޓަކައި މާލޭގައި އަންނަ އަހަރު ހުޅުވަން ނިންމި އިއްޒުއްދީން ސްކޫލަށް ޕްރިންސިޕަލަކު ހޯދަން އިއުލާންކޮށްފި އެވެ.

މާލޭ އިންގްލިޝް ސްކޫލު (އެމްއީއެސް) ކުރިން ހިންގި އިމާރާތުގައި ހުޅުވަން ނިންމާފައިވާ އިއްޒުންދީން ސްކޫލުގެ ޕްރިންސިޕަލް ކަމަށް ޝައުގުވެރިވާ ފަރާތްތަކުން އެކަމަށް އެދި ހުށަހަޅަން ހުޅުވާލާފައިވާ އެންމެ ފަހު ތާރީހަކީ މިމަހުގެ 20 ވަނަ ދުވަހެވެ.

އެޑިޔުކޭޝަން މިނިސްޓްރީން ވަނީ އެސްކޫލުގެ ޑެޕިއުޓީ ޕްރިންސިޕަލު ކަމާއި އެޑްމިނިސްޓްރޭޓަރަކު ހޯދަން ވެސް އިއުލާނުކޮށްފަ އެވެ. މިނިސްޓްރީން ބުނި ގޮތުގައި އަންނަ އަހަރުގެ ސްކޫލު ކިޔެވުން ފެށުމުގެ ކުރިން އެ ސްކޫލަށް މުވައްޒަފުން ހަމަކުރުމުގެ މަސައްކަތް މިހާރު ދަނީ ކުރިއަށެވެ.

އެޑިޔުކޭޝަން މިނިސްޓްރީން ބުނީ އަންނަ އަހަރު އެ ސްކޫލުގައި ކިޔަވައިދޭނީ ގްރޭޑު އެކަކުން ހަ އަކަށް ކަމަށާއި ގްރޭޑު ހަތަކުން 10 އަކަށް ގްރޭޑް ތައާރަފުކުރާނީ 2021 ވަނަ އަހަރުން ފެށިގެން ކޮންމެ އަހަރަކުވެސް ގްރޭޑެއް އިތުރުކޮށްގެން ކަމަށެވެ.

އެއްދަންފަޅިއަށް ކިޔަވައިދޭ ސްކޫލެއްގެ ގޮތުގައި އެތަނުން ކިޔަވައިދޭން މިނިސްޓްރީން ނިންމާފައިވާއިރު މި ސްކޫލުގައި ގްރޭޑު 2 އަކުން 6 އަކާ ދެމެދު ގްރޭޑުތަކަށް ކުދިން ވައްދަން ބޭނުންވާ ފަރާތްތަކަށް އެކަމަށް އެދި މިނިސްޓްރީއަށް ސިޓީ ހުށަަހަޅަން މިހާރު ވަނީ ހުޅުވާލާފަ އެވެ.

މިނިސްޓްރީން ބުނީ އެ ސްކޫލަަށް ދަރިވަރުން ވެއްދުމުގައި ވެސް އަމަލުކުރާނީ މާލޭގެ އެހެން ސްކޫލުތަކަށް ވެސް ދަރިވަރުން ވެއްދުމުގައި އަމަލުކުރަމުން އަންނަ އުސޫލުގެ ދަށުން ކަމަށެވެ. އަދި ސްކޫލުަގައި ކިޔެވުމަށް ޖާގަ ދޭނީ އެކަމަށް އެދި ހުށަހަޅާ ތަރުތީބުން ކަމަށްވެސް މިނިސްޓްރީން ބުނެ އެވެ.

މާލޭގެ ސްކޫލުތަކުގައި ޖާގަދޭ ގޮތާއި ގުޅިގެން އާންމުންގެ ކަންބޮޑުތަކެއް ހުރި ނަމަވެސް ސީއެންއެމް ޓީވީގެ އިތުރުކާފު ޕްރޮގްރާމުގައި ވާހަކަދައްކަވަމުން އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ރަޝީދު ވިދާޅުވީ ދަރިވަރު ދިރިއުޅޭ ސަރަހައްދާ އެންމެ ކައިރީގައިވާ ސުކޫލަކުން ފުރުސަތު ދިނުމަށް ގެންގުޅޭ އުސޫލުގެ ދަށުން ސުކޫލުތަކުން ކުދިންނަށް ޖާގަ ދިނުމުގައި ވަރަށް އިންސާފުވެރިކަމާ އެކީ މިސަރަކާރުން އަމަލުކުރަމުންދާނެ ކަމަށެވެ.