ކޮވިޑް-19 އާއި ގުޅޭ އެންމެ ފަހުގެ މައުލޫމާތުތަށް ހިއްސާކުރުމަށް އެޗްއީއޯސީން ބޭއްވި ނޫސްވެރިންގެ ބައްދަލުމުގައި ވާހަކަ ދައްކަވަމުން ޑރ.ނަޒްލާ ވިދާޅުވީ، މިހާރު މާލެ ސަރަހައްދުން 18 އަހަރުން މަތީގެ ހުރިހާ ފަރާތްތަކަށާއި، އަތޮޅުތެރޭގައި އުމުރުންދުވަސްވީ މީހުންނާއި، 18 އަހަރާއި 50 އަހަރާއި ދެމެެދުގެ ގުރޫޕްތަަކަށްވެސް މަޑުމަޑުން ވެކްސިން ދެވެމުންދާ ކަމަށެވެ.
އެހެންކަމުން ވެކްސިނޭޝަން ހުޅުވިފައިހުރި ގުރޫޕްތަކުގެ ބޭފުޅުން އަވަހަށް ވެކްސިންގެ ރައްކާތެރިކަން ލިބިގަތުމަށް ޑރ. ނަޒްލާ ވަނީ އިލްތިމާސްކުރައްވާފަ އެވެ.
ވެކްސިން ޖަހަން ވަޑައިގަންނަވާއިރު ބަލީގެ އަލާމަތްތައް ހުންނަ އެއްވެސް ފަރާތަކުން ވެކްސިން ސެންޓަރުތަކަަށް ވަޑައި ނުގަތުމަށް އިލްތިމާސް ކުރާކަމަށާއި، ބަލީގެ އަލާމާތްތައް ހުރިނަމަ ވީހާވެސް އަވަހަކަށް ސާމްޕަލް ނެގުމަކީ ވަރަށް މުހިންމު ކަމަށް ޑރ. ނަޒްލާ ވިދާޅުވިއެވެ. އޭގެ އިތުރުން އައިސޮލޭޝަން އާއި ކަރަންޓީންގައި ތިއްބަވާ ފަރާތްތަކުންވެސް ވެކްސިން ސެންޓަރުތަކަށް ނައުމަށް ޑޮކްޓަރު ވަނީ އިލްތިމާސްކޮށްފައެވެ.
