މި ބަގާވާތުގައި މިޔަންމާގެ ދައުލަތުގެ އިސްވެރިން ހައްޔަރުކޮށް އަސްކަރިއްޔާއިން ވަނީ އެގައުމުގެ މަޖިލިސް ވެސް ހިސޯރުކޮށްފައެވެ.
މި ބަގާވާތާއި ދެކޮޅަށް އެންމެ ފުރަތަމަ ހަޅުތާލުކުރަން ނުކުތީ މިޔަންމާގެ އަވަށްޓެރި ތައިލޭންޑުގައި ތިބި މިޔަންމާ ރައްޔިތުންނެވެ.
އޭގެ ހަފްތާއެއްހާ ދުވަސް ފަހުން މިޔަންމާގެ މަގުތަކަށްވެސް ރައްޔިތުން ނުކުމެ މުޒާހަރާ ކުރަން ފެށިއެވެ. މި މުޒާހަރާތައް ކޮންޓްރޯލް ކުރަން ނުކުތް އަސްކަރިއްޔާގެ އޮފިޝަލުން ދުވަހަކަށްވުރެ ދުވަހެއް އަނިޔާވެރިކަން އިތުރުކުރަމުން ގެންދިޔައެވެ.
މިގޮތުން މުޒާހަރާ ކުރާ މީހުންނަށް ތަފާތު ގޮތްގޮތުން އަނިޔާ ކުރަމުން ގެންދިޔައެވެ. އަދި ހަފްތާއެއްހާ ދުވަސް ފަހުން ބަޑިޖަހައި މުޒާހަރާގެ ބައިވެރިން މަރަން ފެށިއެވެ.
މިޔަންމާގެ މުޒާހަރާތަކުގެ ތެރެއަށް ސިފައިން ބަޑިޖަހައި މިއަދުވެސް ހަ މީހުން މަރަލައިފިއެވެ.
މީގެ ތިން ދުވަސް ކުރިން ވެސް މިޔަންމާ ސިފައިން ވަނީ މުޒާހަރާ ކުރާ މީހުންގެ ތެރެއަށް ބަޑިޖަހައި 18 މީހުން މަރާލާފައެވެ.
ބަޑިޖަހާފައިވާ މީހުންނަށް ސިއްހީއެހީތެރިކަން ފޯރުކޮށް ދިނުމަށް ހުރަސް އެޅުމުގެ ސަބަބުން ބައެއް މީހުން އަންނަނީ މަގުމައްޗަށް މަރުވަމުންނެވެ. މަރުވާ މީހުން ސިފައިން ގެންދަނީ ދަމާފައެެވެ.
މިޔަންމާއިން 300 މީހުން މިއަދު ވަނީ ހައްޔަރުކޮށްފައެވެ.
މުޒާހަރާކުރާ މީހުންނަށް ސިފައިން އަނިޔާކުރާ ވީޑިއޯތައް ވެސް ވަނީ ސޯސަލް މީޑިއާގައި އާންމުވެފައެވެ.
އަދި މުޒާހަރާގައި އަނިޔާވާ މީހުންނަށް ފަރުވާ ދޭން ދާ ސިއްހީ އެހީތެރިންގެ އެންބިއުލާންސް އެއްވެސް ހުއްޓުވައި އޭގައި ތިބި މީހުންނަށް އަނިޔާކުރާ ވީޑިއޯއެއްވެސް މިއަދު ސޯސަލް މީޑިއާގައި އަންނަނީ ދައުރުވަމުންނެވެ.
މި ބަގާވާތާއި ގުޅިގެން އަދި އެގައުމުގެ ސިފައިންނާއި ފުލުހުން ގުޅިގެން ހިނގަމުން ގެންދާ އަނިޔާވެރި އަމަލުތައް މިހާރު އދ އިން އަންނަނީ ތަހުގީގު ކުރަމުންނެވެ.
