އިންޑިއާ ސަރުކާރުން ބުނެފައިވަނީ މިޔަންމާގެ ބައެއް ފުލުހުންނާއި އެ މީހުންގެ އާއިލާތަކުން ބޯޑަރު ހުރަސްކޮށް އިންޑިއާއަށް އެތެރެވީ ފެބްރުއަރީ 1 ގައި ހިންގި ބަގާވާތަށް ފަހު ކަމަށެވެ.
އިންޑިއާއަށް ފޮނުވި ސިޓީއެއްގައި މިޔަންމާއިން ބުނީ އެ މީހުން އަނބުރާ ހަވާލުކޮށް، ދެ ގައުމުގެ ގާތް ގުޅުން ދަމަހައްޓަން އެދޭ ކަމަށެވެ.
މިޔަންމާގެ އަސްކަރިއްޔާއިން މިދިޔަ މަހު ބަގާވާތް ކުރުމަށް ފަހު އިންތިހާބީ ލީޑަރުން ހައްޔަރު ކުރުމާ ގުޅިގެން އެ ގައުމުގެ ރައްޔިތުން އަންނަނީ މެދުކެނޑުމެއް ނެތި މުޒާހަރާ ކުރަމުންނެވެ.
މުޒާހަރާ ކުރާ މީހުންނާ ދެކޮޅަށް ބާރުގެ ބޭނުން ހަރުކަށިކޮށް ކުރަމުން ދާއިރު، މިހާތަނަށް ޖުމްލަ 55 މީހަކު މަރުވެފައިވާ ކަމަށް ރިޕޯޓުތައް ބުނެ އެވެ.
އިއްޔެ ވެސް ގައުމުގެ އެކި ހިސާބުތަކަށް އާއްމުން އެއްވި އެވެ. އެންމެ ބޮޑު ޔެންގޯން ސިޓީގައި ފުލުހުން ވަނީ މުޒާހަރާ ރޫޅާލުމަށް ކަރުނަ ގޭހާއި، ރަބަރު ބުލެޓް އަދި ސްޓަން ގްރެނޭޑް ބޭނުންކޮށްފަ އެވެ.
ރޮއިޓާޒް އިން ރިޕޯޓު ކުރާ ގޮތުގައި މިޔަންމާގެ 30 އަށް ވުރެ ގިނަ ފުލުހުންނާއި އެ މީހުންގެ އާއިލާތަކުން ވަނީ ބޯޑަރު ހުރަސްކޮށް އިންޑިއާއަށް ގޮސްފަ އެވެ.
އޭގެ އިތުރުން މިޔަންމާގެ އާއްމު ރައްޔިތުން ވެސް އެ ގައުމުގެ ހަމަނުޖެހުމުން ސަލާމަތްވުމަށްޓަކައި އިންޑިއާއަށް އެތެރެވުމަށް ބޯޑަރު ކައިރިއަށް ޖަމާވަމުންދާ ކަމަށް އޭއެފްޕީއިން ރިޕޯޓުކުރެ އެވެ.
