އޭގެ އިތުރުން ޑިރެކްޓާ ޖެނަރަލް ވިދާޅުވީ ގައިޑްލައިނާ އެއްގޮތްވާ ގޮތުގެ މަތިން ހުރިހާ ފަރާތްތަކަށް ވެސް ފުރުސަތު ހުޅުވާލާފައިވާ ކަމަށާއި އޭގެ ދަށުން ރައްކާތެރިކަމަށް ވަރަށް ބޮޑަށް ސަމާލުވާން އަންގާފައިވާ ކަމަށެވެ.
މިހާރު ވެސް ކެންޑިޑޭޓުން އަންނަނީ ކެމްޕެއިން ކުރަމުންނެވެ. އެގޮތުން މި އިންތިހާބުގައި މާލޭގެ މޭޔަރުކަމުގެ ގޮނޑި ވަރަށް ވާދަވެރިކޮށް ފެނިގެންދާއިރު އެމްޑީޕީގެ ކެންޑިޑޭޓާއި އިދިކޮޅު ކެންޑިޑޭޓް ވެސް އަންނަނީ ދޮރުން ދޮރަށް ކެމްޕެއިން ހަރަކާތް ވެސް ޖައްސަމުންނެވެ.
އީސީގެ ކަންބޮޑުވުންތަކާއި ގުޅިގެން ޑިރެކްޓާ ޖެނަރަލް އިތުރަށް ވިދާޅުވީ، އިންތިހާބަށް ލުއި ގޮތްތަކެއް ހޯދައިދިނުމަށް އީސީން އެދިފައިވާއިރު، އަޅާފައިވާ ފިޔަވަޅުތަކަކީ އެންމެންގެ ރައްކާތެރިކަމަށް އެޅިފައިވާ ފިޔަވަޅުތަކެއް ކަމަށެވެ. އެގޮތުން ކަރަންޓީނު ނުވެ ރަށްރަށަށް ދަތުރުކުރެވޭނެ ގޮތްތަކެއް އޮތްއިރު މިހާރު ވެސް އޮތީ ކަރަންޓީނުގެ 14 ދުވަހުން 10 ދުވަހަށް ކުޑަކޮށް ލުއިދީފައިކަން ފާހަގަކުރެއްވި އެވެ. އަދި ކަރަންޓީނަށް ފަހު މަސައްކަތް ކުރެވޭނެ ކަަމަށް ވިދާޅުވި އެވެ.
ޑިރެކްޓާ ޖެނަރަލް ވިދާޅުވީ ރަށެއް މޮނިޓަރިންގެ ހާލަތަށް ގެންނަނީ އެރަށެއްގައި ބަލި އޮތް މިންވަރު ނޭނގޭތީ ކަަމަށާއި އެއާއެކު ރަށަަށް އަރާއި ފޭބުން ހުއްޓާލަނީ ރައްކަލަކަށް ކަމަށެވެ. އެކަމަކު އެކަމަށް ވެސް ލުއި ގޮތްތަކެއް ހޯދައިދެވޭތޯ ބެލޭނެ ކަމަށް ވިދާޅުވި އެވެ.
މިހާރު އެޗްޕީއޭގެ ގައިޑްލައިން އޮންނަ ގޮތަށް ކެންޑިޑޭޓުން ވެސް އިލެކްޝަންސްގެ އޮފިޝަލުން ވެސް ރަށްރަށަށް އަރާނަމަ، ކަރަންޓީނުވާން ޖެހެ އެވެ. އަދި އެއް ރިސޯޓުން އަނެއް ރިސޯޓަށް ގޮސް ކަރަންޓީނުވާންޖެހޭ ޖެހުމާއި ގެސްޓްހައުސް ހުންނަ ރަށްރަށަށް ގޮސް ކަރަންޓީނުވާން ޖެހެ އެވެ. މި ކަންބޮޑުވުންތައް އީސީން މިއަދުގެ ކޮމިޓީގައި ހިއްސާކޮށްފައިވެ އެވެ.
