އެރަށުގެ ކައުންސިލުން ސީއެންއެމްއަށް މައުލޫމާތު ދެއްވަމުން ވިދާޅުވީ އެ ރަށުގައި އުމުރުން 18 އަހަރު ނުފުރޭ ދެ ކުއްޖަކު ބަލިވެ އިން މައްސަލަ ދަނީ ޖެންޑާ މިނިސްޓްރީ އާއި ފުލުހުން ވެސް ބަލަމުން ކަމަށެވެ.
ރަށުގެ ހާލަތާ ގުޅިގެން ކަންބޮޑުވުން ފާޅު ކުރަމުން ކައުންސިލްގެ މެމްބަރަކު ވިދާޅުވީ އަދި އެރަށުގެ ކުޑަކުދިންގެ މެދުގައި މަސްތުވާތަކެތީގެ މައްސަލަ ވެސް އުޅޭ ކަމަށެވެ.
އެފަދަ މައްސަލަތައް ރަށުގައި ފެންމަތިވަމުން އަންނައިރު ރައްޔިތުންގެ އެންމެ ބޮޑު ކަންބޮޑުވުމަކީ އެ މައްސަލަތައް ފިޔަވަޅު އެޅުމުގައި މުވައްސަސާތަކުން ލަސްވެފައިވާތީ ކަމަށެވެ.
އެރަށުން ވާހަކަ ދެއްކި އިތުރު މީހަކު ބުނީ އުމުރުން 17 އަހަރުގެ ދެ ކުއްޖަކު ބަލިވެ އިނދެފައިވާކަމަށެވެ. އެތަނުން އެއް ކުއްޖަކަށް މިހާރު ވަނީ 18 އަހަރުފުރިފައެވެ.
އޭގެ އިތުރުން އެމީހާ ބުނީ ރަށުގައި އެކި ކުށްތަކުގައި އުޅޭ ކުދިންގެ އަދަދު ވަރަށް ގިނަ ކަމަށެވެ.
އެރަށުގައި ޖެންޑާއާ ގުޅިގެން ކުޑަކުދިންނަށް ހޭލުންތެރިކަމުގެ ޕްރޮގްރާމްތައް ވެސް އަންނަނީ ހިންގަމުންނެވެ.
މި މައްސަލައާ ގުޅޭގެން ޖެންޑާ އަދި ފުލުހުންގެ ބަހެއް ލިބިފައެއް ނުވެ އެވެ.
ނަމަވެސް އެ މައްސަލަ ފުލުހުންނާއި ޖެންޑާއިން ވެސް ބަލަމުން އަންނަކަމަށް ކައުންސިލުން ބުނެއެވެ.