މުސްތަފާ މިހެން ވިދާޅުވީ، ޓެރަރިސްޓް ޖަމާއަތަކަށް ނިސްބަތްވާ މީހަކަށް މިނިސްޓަރު ނަހުލާ ފައިނޭންސް ކުރި ކަމުގެ ތުހުމަތު ފެންމަތިވުމާއި ގުޅިގެން އެކަމަށް އިޝާރާތް ކުރައްވައި ކުރެއްވި ޓްވީޓެއްގައެވެ.
މުސްތަފާ ވިދާޅުވީ، މިނިސްޓަރު ނަހުލާގެ ރީތިކަމާހުރެ އެކަމަނާއަށް ނިސްބަތްކޮށް އެއްވެސް އެއްޗެއް ވިދާޅުވާން މަޖިލީހުގެ ރައީސް މުހައްމަދު ނަޝީދު ހުންނަވަނީ ބިރުން ކަމަށާއި، ނަމަވެސް އެކަމަނާއަށް ވުރެ "މާތީރި އަބުރުވެރި ކަނބަލުން ރާއްޖޭގައި އެބަތިބި" ކަމަށެވެ.
ޓެރަރިސްޓަކަށް މިނިސްޓަރު ނަހުލާ ފައިނޭންސް ކުރިކަމަށްބުނާ ވާހަކަތަކެއް މިއަދު ފެންމަތިވީނަމަވެސް އެކަމަނާ ވަނީ އެކަން ދޮގުކުރައްވާފައެވެ. އަދި އެއީ ފިތުނަ އުފައްދަން ކުރަމުން އަންނަ މަސައްކަތެއް ކަމަށް އެކަމަނާ ވަނީ ސިފަކުރައްވާފަ އެވެ.
އަނެއްކޮޅުން ދާދިފަހުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ، ޓްރާންސްޕޯޓް މިނިސްޓަރީގައި މައްސަލަތަކެއް އުޅޭކަމަށް ފާހަގަކުރައްވާފައެވެ. ރައީސް މިކަން ހާމަކުރެއްވީ އެމްޑީޕީގެ "ރަށްވެހި ފަތިސް" ކެމްޕެއިން ޖަލްސާއެއްގައި ވާހަކަ ދައްކަވަމުންނެވެ.
