ހައިލަމް މިހެން ވިދާޅުވެފައިވަނީ ކަރަންޓީނު ނުވެ ކެމްޕޭނު ކުރަން ރަށްރަށަށް ދެވޭގޮތަށް އެޗްޕީއޭއިން އެކުލަވާލި އުސޫލަށް އިސްލާހު ގެނެސް، އިއްޔެ އެ އިސްލާހު އުވާލުމާއި ގުޅިގެންނެވެ.
އެގޮތުން ވެރިކަންކުރާ ޕާޓީން އެންގުމުން އުސޫލުތަކަށް އިސްލާހު ގެނައުމުގެ ބަދަލުގައި، ސިއްހީ މާހިރުންގެ ލަފަޔާއި މަޝްވަރާގެ މަތިން އެފަދަ ބަދަލުތައް ގެންނަނަމަ ރައްޔިތުންގެ ފާޑުކިޔުން އަމާޒެއް ނުވާނެ ކަމަށް ހައިލަމް ވިދާޅުވެފައި ވެއެވެ.
ކަރަންޓީނު ނުވެ ކެމްޕެއިން ކުރުމަށް ރަށްރަށަށް ދެވޭގޮތަށް، "ކޮވިޑް-19 ގެ ހާލަތުގައި ރައްކާތެރިކަމާއެކު ލޯކަލް ކައުންސިލްތަކުގެ އިންތިހާބު ކުރިޔަށް ގެންދިޔުމުގެ އުސޫލަށް" އިސްލާހު ތަކެއް ގެނައީ ބުރާސްފަތި ދުވަހު އެވެ.
އެއާއެކު ގިނަބައެއްގެ ފާޑުކިއުން ވަނީ އެޗްޕީއޭއަށާއި ސަރުކާރަށް އަމާޒުވެފަ އެވެ. އަދި މިއީ މުޅި ރާއްޖެއަށް ކޮވިޑް ފެތުރުމަށް ހުޅުވާލެވޭ ދޮރެއް ކަމަށް ބައެއް މީހުން އައީ އެމީހުންގެ ކަންބޮޑުވުންތައް ސޯޝަލް މީޑިއާ މެދުވެރިކޮށް ހިއްސާ ކުރަމުންނެވެ. އެގޮތުން އެޗްޕީއޭގެ ނިންމުމަށް އާންމުންގެ އިތުރުން ޑޮކްޓަރުންވެސް ފާޑުކިޔާފައި ވެއެވެ.
