ހޮނިހިރު ދުވަހުގެ ރޭ ކުޅުނު ފައިނަލް މެޗުން މުމްބާއީ ސިޓީން ކާމިޔާބު ކުރީ އޭޓީކޭ މޯހަން ބަގާންއާ ވާދަކޮށް ދެ ލަނޑު އެއް ލަނޑުންނެވެ. މި ނަތިޖާގެ ސަބަބުން އަންނަ އަހަރުގެ އޭއެފްސީ ކަޕުގެ ޕްލޭ އޮފްގެ ޖާގަ އޭޓީކޭ މޯހަން ބަގާންއަށް ލިބޭނެއެވެ. އެއީ ލީގު ބުރުގެ ޗެމްޕިއަނުންގެ ހައިސިއްޔަތުން އޭއެފްސީ ޗެމްޕިއަންސް ލީގުގެ ގްރޫޕް ސްޓޭޖުގެ ޖާގަ މުމްބާއީއަށް ލިބިފައިވާތީއެވެ.
އިންޑިއަން ސުޕަރ ލީގުގެ ލީގު ބުރުގެ ޗެމްޕިއަންކަން މުމްބާއީ އެފްސީން ހޯދީ ވިހި މެޗުން ސާޅީސް ޕޮއިންޓް ހޯދައިގެންނެވެ. ލީގު ބުރުގެވެސް ދެވަނަ މަގާމު ލިބުނީ މޯހަން ބަގާންއަށެވެ.
އިންޑިއަން ސުޕާ ލީގުގެ ކުޅުން ކޮވިޑުގެ ނުރައްކަލާހުރެ މިއަހަރު ކުޅުނީ ގޯއާގައެވެ. ކުރިން ހޯމް އެންޑް އަވޭ އުސޫލުން ލީގުގެ މެޗުތައް ކުރިއަށް ގެންދިޔަ ނަމަވެސް މި ފަހަރު މުބާރާތުގެ ހުރިހާ މެޗެއްވެސް ކުޅުނީ އިންޑިޔާގެ ގޯއާގެ ތިން ސްޓޭޑިއަމެއްގައެވެ. ރައްކާތެރިކަމުގެ ފިޔަވަޅެއްގެ ގޮތުން ހުރިހާ މެޗެއްވެސް ކުޅުނީ އާއްމުކޮށް ސަޕޯޓަރުންނަށް ހުޅުވާނުލައެވެ. އެހެންނަމަވެސް ދުނިޔޭގެ އަށްޑިހަ ދެ ގައުމެއްގައި މުބާރާތް ލައިވްކޮށް ދެއްކިއެވެ.
