އެ މައްސަލަ މަޖިލީހަށް ހުށަހެޅުއްވީ ކުރީ އިކޮނޮމިކް މިނިސްޓަރު އަދި މިހާރުގެ މާވަށު ދާއިރާގެ މެމްބަރު މުހައްމަދު ސައީދެވެ.
މަޖިލީހަށް މިމައްސަލަ ހުށަހަޅާފައިވަނީ ރާއްޖޭގެ އެކި ރަށްރަށާއި، މާލެ ސަރަހައްދު އަދި ވަކިން ހާއްސަކޮށް މާލޭގައި ހިންގަމުންދާ ކެފޭ، ރެސްޓޯރެންޓްގެ އިތުރުން ޓެކްސީ، ޕިކަޕް އަދި އެއްގަމު ދަތުރުފަތުރުކުރުމުގެ ހިދުމަތްދޭ ފަރާތްތަކާއި، ކަނޑު ދަތުރުފަތުރުތަކާއި މުދާ އުފުލާ ފަރާތްތަކުގެ އިތުރުން، މުދާ އެއްތަނުން އަނެއްތަނަށް ގެންދިއުމުގެ ހިދުމަތްދޭ ވިޔަފާރިތައް ހީނަރުވަމުންދާތީ، މިކަން ސަރުކާރުގެ ސަމާލުކަމަށް ގެނައުމަށްޓަކައެވެ.
މިދިޔަ ފެބްރުއަރީ މަހުގެ 25 ވަނަ ދުވަހުން ފެށިގެން، ހަތް ދުވަހުގެ މުއްދަތަށް، މާލެ ސަރަހައްދު (މާލެއާއި، ހުޅުމާލެއާއި، ވިލިނގިއްޔާއި، ތިލަފުށްޓާއި، ގުޅީފަޅު) ގައި ހިންގާ ކެފޭ، ހޮޓާ، ރެސްޓޯރަންޓް ފަދަ، އާންމުންނަށް ކާބޯތަކެތީގެ ހިދުމަތް ދޭ އެންމެހައި ތަންތަނުން، ޓޭކް އަވޭއާއި ޑެލިވަރީގެ ހިދުމަތް ފިޔަވައި އެހެނިހެން ހިދުމަތް ދިނުން ރޭގަނޑު 8:00 އިން ފެށިގެން ހުއްޓައިލުމަށް އެޗްޕީއޭ އިންވަނި އަންގާފައެވެ.
މިއާއެކު ކާބޯތަކެތީގެ ހިދުމަތްދޭ ވިޔަފާރިތަކުން ކަންބޮޑުވުން ފާޅުކުރަމުންދަނީ އެމީހުންގެ ވިޔަފާރިތަކަށް އެކަމުގެ ސަބަބުން ބޮޑު ގެއްލުމެއް ލިބެމުންދާ ކަމަށް ބުނެ އެވެ.
