ރާއްޖޭގައި ކޮންމެ އަހަރަކުވެސް ފާހަގަ ކުރަމުން އަންނަ ޝަހީދުންގެ ދުވަހަކީ އަހަރެމެންގާ ތާރީހާއި ގުޅިފައި އޮތް ދުވެހެކެވެ. މި ދުވަސް ނިސްބަތްވަނީ، އިސްލާމްދީނާއި ދިވެހިންގެ މިނިވަންކަމުގެ ދިފާއުގައި ހަނގުރާމައަށް ނިކުމެ، ޝަހީދުވި ބަތަލަކަށެވެ. ރާއްޖޭގެ މިނިވަންކަމުގެ ދިފާއުގައި، ޕޯޗުގީޒުންނާއި ހަނގުރާމަ ކުރެއްވި އައްސުލްތާނު އަލީ، އާންމު ބަހުރުވައިންނަމަ އަލިރަސްގެފާނުގެ ހަނދާނުގައެވެ.
އަލިރަސްގެފާނު ޝަހީދުވެވަޑައިގެންނެވީ ހިޖުރައިން 965 ވަނަ އަހަރުގެ ޝައުބާން މަހުގެ އެއްވަނަ ދުވަހުއެވެ.
މިއީ ގިނަ ބަޔަކަށް އެނގޭ ކަންކަމެވެ. ސްކޫލު ދައުރުގައި ކޮންމެ އަހަރަކު އެއްފަހަރު އަލިރަސްގެފާނުގެ ޖިހާދުގެ ވާހަކަ، ޝަހީދުންގެ ދުވަހުގެ ހާއްސަ އެސެމްބްލީން އިވިގެންދެއެވެ. ނަމަވެސް ސްކޫލު ނިމި، ދިރިއުޅުމަކާ ކުރިމަތިލާ އިރުވެސް މިފަދަ ދުވަހެއް ރާއްޖޭގައި ފާހަގަ ކުރަމުން އަންނަނީ ކީއްވެތޯ އެނގޭ ބަޔަކު މަދެވެ. މިހެން މިކަން ހިނގަނީ މިފަދަ ދުވަސް ފާހަގަ ކުރަނީ ކީއްވެކަން އެނގުން މުހިއްމު ނޫން ކަމަށް ހީކުރެވޭތީ ކަންނޭނގެއެވެ.
ޝަހީދުންގެ ދުވަހަކީ ކޮބާތޯ ބަލާލާއިރު، މި ދުވަސް ނިސްބަތްވާ ބަތަލަކީ އަލިރަސްގެފާނު ކަމަށް ވީނަމަވެސް، މި ދުވަހަކީ ގައުމަށްޓަކާ ޝަހީދުވެ ގޮސްފައިވާ ބަތަލުންގެ ހިދުމަތްތަކުގެ ހަނދާން އާކޮށް، އެ ބަތަލުންގެ ޒިކުރާ އާކުރުމުގެ ގޮތުން ފާހަގަ ކުރާ ދުވަހެކެވެ.
އެއީ ވަކި އަލިރަސްގެފާނު އެކަންޏެއް ނޫނެވެ. ނަމަވެސް އުތީމު އަލިތަކުރުފާނު، ކަނބާ އައިޝާ ރަނިކިލެގެފާނު އަދި އައްސުލްތާން އިބްރާހީމް ކަލާފާނު ފަދަ ބޭފުޅުންނަކީ ގައުމަށްޓަކާ ޝަހީދުވި ބޭފުޅުންނެވެ. މިއީ މި ބޭފުޅުން ގައުމަށްވެދެއްވި ގުރުބާނީގެވެސް އަގުވަޒަން ކުރަންވީ ދުވަހެކެވެ.
މިފަދަ ދުވަސްތައް އަހަރެމެން ފާހަގަ ކުރަނީ، ތާރީހުން ފިލާވަޅު ލިބިގަނެ، ތިމާގެ މުސްތަގުބަލު އުޖާލާ ކުރުމަށެވެ. ގައުމަށްޓަކާ ޖިހާދުވި ޝަހީދުންގެ ހަނދާން އާކޮށް، އެމީހުންގެ ވާހަކަތަކުން އެތައް ފިލާވަޅެއް އަހަރެމެންނަށް ލިބިގެން ދެއެވެ. މިއީ އެ ފިލާވަޅުތަކުން އިބުރަތް ހާސިލްކޮށް، އެމީހުންގެ ހިދުމަތަށް ޝުކުރު އަދާކުރަން ލިބޭ ފުރުސަތެކެވެ.
