ހެލްތު ޕްރޮޓެކްސަން އެޖެންސީގެ ގައިޑްލައިންތަކުގެ ސަބަބުން ވިޔަފާރިތަކަށް ބޮޑެތި ގެއްލުންތަކެއް ވަމުންދާތީއާއި، އެތައް ދިވެހިންނެއްގެ ވަޒީފާ ގެއްލި، އިގްތިސާދަށް ނުރައްކާވަމުން އަންނާތީ، ސަރުކާރުން އަވަސް ފިޔަވަޅުތަކެއް އެޅުމަށް އެދި އިއްޔެ ސައީދު ވަނީ މަޖިލީހަށް ކުއްލި މައްސަލައެއް ހުށަހަޅާފަ އެވެ.
މިއަދުގެ ޖަލްސާގައި އެ މައްސަލައަށް ބަހުސް ކުރަމުން އަންނައިރު އެ މައްސަލައާގައި ވާހަކަ ދައްކަވަމުން ސައީދު ވިދާޅުވީ، ޒުވާން ވިޔަފާރިވެރިން ތިބީ ގޮތް ހުސްވެފައި ކަމަށާއި ސަރުކާރުން ލޯނު ދިނަސް ދިން ލޯނުތައް ފެންނާން ނެތް ކަމަށް ވިދާޅުވި އެވެ. މިހެންވެ ވިޔަފާރިވެރިން ސަލާމަތްވުމަށްޓަކައި ހެދުން ވިއްކާ ތަންތަނުގައި ގަސް ވިއްކަމުން އަންނަ ކަމަށާއި އޮރެންޖް ވިއްކަމުން އަންނަ ތަންތަނުގައި ސްޕެއާ ޕާޓްސް ވިއްކަމުން އަންނަ ކަމަށެވެ.
އޭގެ އިތުރުން ސައީދު ވިދާޅުވީ މަޖިލީހުން ދައުލަތް ހަމަ އިސްކޮށް ނެގުމަށް މަސައްކަތްކުރާއިރު އެޗްޕީއޭ މެދުވެރިކޮށް ސަރުކާރުން ދޯހަޅި ސިޔާސަތުތައް ހަދަމުން އަންނަ ކަމަށެވެ. ސައީދު ވަނީ ރައީސް އޮފީހަށް ވެސް ތުހުމަތުތަކެއް ކޮށްފަ އެވެ. އެގޮތުން އެޗްޕީއޭގެ ގައިޑްލައިންތައް ހަދަނީ ރައީސް އޮފީހުން ކަމަށް ވިދާޅުވި އެވެ. އަދި އެކަން ކުރުން ހުއްޓާލުމަށް ގޮވާލާއި، ސައީދު ވިދާޅުވީ ދައުލަތުން ތިން ބިލިއަން ރުފިޔާ ހަރަދުކުރީ ރައްޔިތުން ގެއަށް ވަދެ ތަޅުލެވިފައި ތިބެން ނޫން ކަމަށެވެ. އަދި ރައްޔިތުން މިނިވަންކުރުމަށް ގޮވާލި އެވެ.
