ސައީދު ވަނީ ކޮވިޑް ވެކްސިން ޖަހަން ގޮސް ތިބި މީހުންގެ ފޮޓޯއެއް ޓްވީޓާގައި އާންމުކޮށްފަ އެވެ. ބެލެވޭ ގޮތުގައި ބިދޭސީންގެ އެ ކިއުގައި ކުޑަ ވެސް މިންވަރަކަށް ގައިދުރުކަމެއް ނެތެވެ. އެކަކު އަނެކަކުގެ ގައިގައި ޖެހި ފިތިގެން ތިބުމާއި ގުޅިގެން ސައީދު ކުރެއްވި ޓްވީޓުގައި ވިދާޅުވީ އެ ކިއުއިން ކޮމިއުނިޓީ ސްޕްރެޑެއްގެ ނުރައްކާ ނުފެންނާތީ އަޖައިބުވާ ކަމަށެވެ.
އަދި އެހާލަތަށް ދިއުމުން އެޗްޕީއޭގެ ކަންކަން މިހާރު މިނިވަން ނޫންކަން އެނގޭ ކަމަށް ސައީދު ވިދާޅުވި އެވެ.
މީގެ ކުރިން ވެސް ސައީދު ވަނީ އެޗްޕީއޭ މިނިވަން ނޫންކަމުގެ ތުހުމަތުތައްކޮށްފަ އެވެ. އެގޮތުން ކޮވިޑާ ގުޅިގެން އެތަނުން ތައްޔާރުކުރާ ގައިޑްލައިންތައް ހަދަނީ ސަރުކާރުން ބުނާ ގޮތަކަށް ކަމަށް ތުހުމަތު ކުރައްވަ އެވެ.
މާލޭ ސަރަހައްދުގައި މިއަދު ވެކްސިންގެ ފުރަތަމަ ޑޯޒް ޖެހުން ހުއްޓާލާތީ ގިނަ ބަޔަކު ވެކްސިން ސެންޓަރުތައް ދޮށުގައި ކިއު ޖެހިގެން ތިބޭއިރު އެތަންތަނުގައި އެކަކު އަނެކަކުގެ ދެމެދުގައި ތިން ފޫޓުގެ ގައިދުރުކަމެއް ވެސް ނެތެވެ.
ހެނދުނު 9:00 އިން ފެށިގެން 16:30 އާ ހަމައަށް ސެންޓަރުތަކުން ވެކްސިން ޖަހައިދެމުން އަންނައިރު މި ސެންޓަރުތަކުގެ ކިއު ދިގުކަމުން، ބަންދުކުރާ ފަހުން ވެސް ކިއުގައި ތިބޭ މީހުންނަށް ވެކްސިންދޭން އެތައް ވަގުތެއް ހޭދަވެ އެވެ.
