މި މައްސަލާގައި ސީއެންއެމްއަށް މައުލޫމާތު ދެއްވަމުން އައިޖީއެމްއެޗްގެ މީޑިއާ ކޯޑިނޭޓާ ވިދާޅުވީ، އެ މައްސަލަ މިހާރު އައިޖީއެމްއެޗް އިން ދަނީ ބަލަމުންކަމަށާއި މައްސަލަ ބެލުމަށްފަހު ވަރަށް އަވަހަށް މައްސަލައިގެ މައުލޫމާތު ސޯޝަލް މީޑިއާގައި ހިއްސާކުރާނެ ކަމަށެވެ.
ދުވަސް ނުފުރާ ވިހާ ކުދިންނާއިމެދު ހޮސްޕިޓަލުން ކަންކުރުމުގައި ގެންގުޅޭ އުސޫލާއި ބެހޭގޮތުން ސުވާލު ދެއްނެވުމުން އައިޖީއެމްއެޗްއިން ވަނީ އެކަމަކީ މެޑިކަލީ އަދދި ބަލަންޖެހޭ ކަންކަމެއް ކަމަށްވުމުން އެޔާއި ގުޅޭ މައުލޫމާތު ހިއްސާކުރެވެން ނެތް ކަމަށް ވިދާޅުވެފައެވެ. އަދި އެ މައުލޫމާތުވެސް ފަހުން ހިއްސާކުރާނެ ކަމަށް ބުނެފައިވެއެވެ.
އާއިލާއިން ސޯޝަލް މީޑިއާގައި މި ހާދިސާ ހިއްސާކޮށްފައިވާ ގޮތަށް ބަލާއިރު، ބަނޑުގައި ރިއްސާތީ ދަރިފުޅުގެ މަންމަ ދިޔުމުން ހޮސްޕިޓަލްގައި ދެ ދުވަސް ވަންދެން ވަނީ އެޑްމިޓްކޮށްގެން ބާއްވާފައެވެ. އަދި ވިހެއުމުގެ ރިހުންވަރު ކައިރިވިއިރުވެސް ހޮސްޕިޓަލްގެ ޑޮކްޓަރުންނާއި ނަރުހުން އަޅާލާފައެއް ނުވާކަމަށް ބުނެ އެވެ.
އެއަށް ފަހު ކުއްޖާގެ މަންމަ ގެންގޮސް މަސް ވިއްސުވުމަށް ފަހު ގެނެސް ވޯޑަށް ނެރުނުއިރުވެސް ކުއްޖާ ބާއްވާފައިވަނީ އޭރު ބޭއްވިތާގައި ބޭއްވިގޮތަށް ސާފުވެސް ކޮށް ނުލާކަމަަށް އާއިލާއިން ބުނެއެވެ. އަދި އާއިލާއިން އެދުމުންވެސް އެނޫންގޮތެއް ނުހެދުމުން ކުއްޖާ ނަގާފައިވަނީ ހޮސްޕިޓަލްގެ މެނޭޖްމެންޓާއި ވާހަކަ ދެއްކުމުން ކަމަށް އާއިލާއިން ބުނެއެވެ. ކުއްޖާއަކީ ދުވަސް ނުފުރާ ވިހޭ ކުއްޖަކަށްވުމުން ކުއްޖާގެ ގުނަވަންތައް ރަނގަޅަށް އުފެދިފައެއް ނުވެއެވެ. އަދި ކުއްޖާ އޮތީ ވަރަށް ވެސް ކުޑަކޮށްނެވެ. މެނޭޖްމެންޓާއި ވާހަކަ ދެއްކުމުން ކުއްޖާ ނެގުމަށް ފަހު ހުދުފޮތި އަޅާއި، ލާފައިވަނީ ޓްރޭއަކަށެވެ. ކުއްޖާ މަރުވެފައިވަނީ އެހެން އެ ޓްރޭގައި އޮވެ ކަމަށް އެ އާއިލާއިން ތުހުމަތު ކުރެ އެވެ.
