މިނިސްޓަރު މާރިޔާ މިގޮތަށް އިލްތިމާސްކުރެއްވީ ޑިފެންސް މިނިސްޓްރީން ކޮންމެ ހަފްތާއަކު އާންމުކުރާ "މިނިސްޓަރުގެ ގަލަންކޮޅުން'' ގަ އެވެ.
މިނިސްޓަރު ވިދާޅުވީ ޝަހީދުންގެ ދުވަސް ނިސްބަތް ވަނީ ޕޯޗުގީޒުންނާއި ދެކޮޅަށް ދީނާއި، ވަތަންގެ ހައްގުގައި ޖިހާދަކުރައްވާ އަލި ރަސްގެފާނު ޝަހީދުވި ދުވަހަށް ކަމަށެވެ. އަދި އަލި ރަސްގެފާނު ޝަހީދުވި ހާދިސާއަކީ އިބްރަތުން ފުރިގެންވާ ފިލާވަޅެއް ކަމަށެވެ.
އަމިއްލަ އެދުންތަކުން ފޯވެފައިވާ ފަރާތްތަކެއް އެއިރު ވެސް މިގައުމުގައި ތިބިކަން ތާރިހުން ބުނެދޭކަން ފާހަގަކުރަމުން މިނިސްޓަރު ވިދާޅުވީ ކީރިތި މަހާރަދުންނަށް އޮޅުވާލާ ދޮގު ދަންނަވައިގެން އަމާން ދެއްވުމަށް މަޖުބޫރުކުރި ކަމަށެވެ. އެކަމުގެ ހަގީގަތް އެނގިވަޑައިގެންނެވުމުން އަލި ރަސްގެފާނު ނިންމެވީ ގިނިކަންޏާ ނަމަވެސް ދީނާއި ވަތަންގެ ހައްގުގައި ދުޝްމަނުންނާއި ކުރިމަތިލުމަށް ކަމަށް ވެސް މިނިސްޓަރު ވިދާޅުވި އެވެ.
އެކަމުން އިބުރަތް ހާސިލްކޮށް، ގައުމު ބައިބައިވެ ފަސާދަވުމަށް ފުރުސަތު ނުދީ މިއަދުވެސް ބޭނުން ވަނީ، ކޮވިޑް 19 މިހާލަތުގައި ވެސް ހަގީގަތާއި ހިލާފު ވާހަކަތައް ނުފަތުރާ މިހިތްދަތި އަޑިގަނޑުން އަރައި ގަތުމަށް ދިވެހި އަސްކަރިއްޔާގެ އެންމެހާ ސިފައިންނާއި ސިފައިންގެ އާއިލާތަކުން ކޯވިޑް ވެކްސިން ޖެހުމަށް މިނިސްޓަރު އިލްތިމާލް ކުރައްވާފައި ވެއެވެ.
ކޮވިޑް-19 އާއި ދެކޮޅަށް ކުރާ މަސައްކަތުގައި މިހާރުވެސް ގިނަ ހުރަސްތަކާއި، ބޮޑެތި ގޮންޖެހުންތަކާއި ކުރިމަތިލާން ޖެހިފައިވާކަން ފާހަގަކުރަމުން މިނިސްޓަރު ވިދާޅުވީ މާތްاللهُ ގެ ވާގިފުޅާއެކު، އެ ހުރަސްތައް ގިރާކޮށް، މިއަދު ރާއްޖެ އޮތް ހާލަތަށް އާދެވުމުގައި، ދިވެހި ސިފައިންގެ ދައުރު ވަރަށް ބޮޑުކަމަށެވެ.
އަދި ޝަހީދުންގެ ދުވަހުގެ ހަނދާންތައް އާކުރަމުން އަންނައިރު، މިއަދު ވެސް ދިވެހިންނަށް ލިބިފައިވާ އެންމެ ބޮޑު ހަދިޔާއަކީ، ދިވެހި ކާބަފައިން، މިގައުމު މިނިވަންކަމާއެކު މިއަދާ ހަމަޔަށް ގެނެސްދީފައި އޮތް އޮތުން ކަމަށް ވެސް މިނިސްޓަރު ފާހަގަކުރެއްވި އެވެ. އަދި އެކަން އެގޮތުގައި ތާއަބަދަށް ދަމަހައްޓަން ދިވެހި އަސްކަރިއްޔާއިން އަތާ އަތް، ކޮޑާ ކޮޑު ގުޅުވައިގެން ތިބި ކަމާމެދު މިގައުމުގެ އެއްވެސް ރައްޔިތަކު ސުވާލެއް ނުކުރާނެކަން ކަމަށް ވެސް މިނިސްޓަރު ވިދާޅުވެފައި ވެއެވެ.
އޭގެ އަލިގަދަ ހެއްކެއްގެ ގޮތުން މިއަދު ވެސް ދިވެހި ސިފައިންގެ ފަންނީ ހުނަރު ކުރިއަރުވައި ތައްޔާރީ ހާލަތު އިތުރު ކުރުމާއި ޒަމާނީ ވަސީލަތްތަކާއި އާލާތްތައް ހޯދައި ދިވެހި އަސްކަރިއްޔާގެ އިންސާނީ ވަސީލަތް ހަރުދަނާކޮށް ތަރައްގީކުރުމަށް ރައީސް ސޯލިހް ގެންގުޅުއްވާ ހިކުމަތްތެރި ވިސްނުންފުޅު ނުހަނު އުފަލާއެކު ފާހަގަކުރާ ކަމަށް ވެސް މިނިސްޓަރު މާރިޔާ ވިދާޅުވި އެވެ.
