ޑިރެކްޓާ ޖެނަރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއި ކުރައްވާ، ނެރެފައިވާ އިއުލާނެއްގައި ބުނީ މިވަގުތުން ފެށިގެން މާޗު މަހުގެ 24 ވަނަ ދުވަހުގެ ނިޔަލަށް، ފިޔަވަޅުތައް ދަންމާލަން ނިންމާފައިވާ ކަމަށެވެ.
އެގޮތުން މާލެ ސަރަޙައްދުގައި ހިންގާ ކެފޭ، ހޮޓާ، ރެސްޓޯރަންޓް ފަދަ، އާންމުންނަށް ކާބޯތަކެތީގެ ހިދުމަތް ދޭ ހުރިހާ ތަންތަނުން، ޓޭކް އަވޭއާއި ޑެލިވަރީގެ ހިދުމަތް ފިޔަވައި އެހެނިހެން ހިދުމަތް ދިނުން ރޭގަނޑު 8:00 އިން ފެށިގެން ހުއްޓައިލަން ޖެހޭނެ އެވެ.
އަދި ޓޭކްއަވޭ އާއި ޑެލިވަރީގެ ހިދުމަތްތައް ވެސް ރޭގަނޑު 10:30 އިން ފެށިގެން ހުއްޓާލަން ޖެހޭނެ ކަަމަށް އެންގުމުގައިވެ އެވެ.
އޭގެ އިތުރުން ފިޔަވަޅު ތަންފީޒުކޮށް، އެ ފިޔަވަޅު ފުރިހަމައަށް ޢަމަލުކުރުމަށް، ހުރިހާ އިދާރާތަކަށާއި ފަރާތްތަކަށް އަންގާފައިވާއިރު އެ އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރާންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް އަމަލުކުރުމަށް ވެސް އަންގާފައިވެ އެވެ.
ކެފޭ ރެސްޓޯރަންޓުތައް އެހާއިރު ބަންދުކުރަން އަންގާފައިވާތީ އެ ވިޔަފާރިކުރާ ފަރާތްތަކުން އަންނަނީ ނުރުހުން ފާޅުކުރަމުންނެވެ. އެގޮތުން ކޮވިޑްގެ ތެރޭގައި އެފަދަ ވިޔަފާރިތަކަށް ލިބުނު ގެއްލުމުގެ އަދަދު 100 މިލިއަނަށް ވުރެ އިތުރު ވާނެ ކަމަށް ރެސްޓޯރަންޓް އެސޯސިއޭޝަން އޮފް މޯލްޑިވްސް އިން ލަފާކުރެ އެވެ.
