ޑިރެކްޓާ ޖެނެރަލް އޮފް ޕަބްލިކް ހެލްތު، މައިމޫނާ އަބޫބަކުރު ސޮއެކުރައްވައި ގެޒެޓު ކޮށްފައިވާ އެންގުމުގައި ވަނީ، މާލެ ސަރަހައްދުގައި (މާލެއާއި، ހުޅުމާލެއާއި، ވިލިނގިއްޔާއި، ތިލަފުށް ޓާއި، ގުޅީފަޅު ގައި) ހިންގާ ކެފޭ ރެސްޓޯރަންޓު ތައްފަދަ އާންމުންނަށް ކާބޯތަކެތީގެ ހިދުމަތްދޭ އެންމެހާ ތަންތަނުން، މިރެއިން ފެށިގެން، ރޭގަނޑު 10:30 ހަމަށް ހިދުމަތް ދިނުމުގެ ހުއްދަ ދީފައިވާ ކަމަށެވެ.
އަދި މި އެންގުމާއިއެކު މީގެކުރިން، ކާބޯތަކެތީގެ ހިދުމަތްދޭ ތަންތަން ރޭގަނޑު އަށެއްގެ ފަހުން ބަންދުކުރަން އަންގާފައި އޮތް އެންގުން ބާތިލު ކޮށްފައިވާ ކަމަށްވެސް ވަނީ ބުނެފައެވެ.
އެޗްޕީއޭއިން، ކާބޯތަކެތީގެ ހިދުމަތްދޭ ތަންތަން ރޭގަނޑު ރަށެއްގެ ފަހުން ބަންދުކުރަން ޖެހޭގޮތަށް އަންގާފައިވާ އެންގުން އިތުރު ހަތަރު ދުވަހަށް ދަމަހައްޓަން ނިންމީ ރޭގައެވެ. ނަމަވެސް މި އެންގުމާއިއެކު މިއަދުން ދެށިގެން އެތަންތަން ރޭގަނޑު 10:30 އާއި ހަމައަށް ހުޅުވާފައި ބެހެއްޓޭނެއެވެ.
އެޗްޕީއޭއިން އެ އުސޫލަށް ބަދަލުގެނެސްފައި މިވަނީ، އެ އުސޫލުގެ ސަބަބުން ކެފޭ ރެސްޓޯރަންޓު ތަކުގެ ވިޔަފާރިތަކަށް ބޮޑެތި ގެއްލުންތަކެއް ވަމުން އަންނަކަން ފާހަގަކޮށް އެފަރާތްތަކުން އެޗްޕީއޭއަށް ވަރަށް ބޮޑަށް ދާޑުކިއުން އަމާޒުކޮށްފައި ވަނިކޮށެވެ. އެގޮތުން ކޮވިޑްގެ ތެރޭގައި އެފަދަ ވިޔަފާރިތަކަށް ލިބުނު ގެއްލުމުގެ އަދަދު 100 މިލިއަނަށް ވުރެ އިތުރު ވާނެ ކަމަށް ރެސްޓޯރަންޓް އެސޯސިއޭޝަން އޮފް މޯލްޑިވްސް އިން ލަފާކުރެ އެވެ.
މީގެއިތުރުން މިފަދަ މައްސަލަ ތަކަކާއި ގުޅިގެން ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝިދު ވަނީ ލޮކްޑައުން އުވާލަން ތާއީދު ކުރައްވައި ވާހަކަފުޅު ދައްކަވާފައެވެ. އަދި މާދަމާ އެޗްޕީއޭ މަޖިލީގަށް ހާޒިރުކުރަންވެސް ވަނީ ނިންމާފައެވެ.
