ނަޝީދު މިހެން ވިދާޅުވީ މިއަދު ކުރެއްވި ޓުވީޓެއްގަ އެވެ.
އެގޮތުން ސައި ހޮޓާ، ރެސްޓޯރަންޓު އަދި ކެފޭތައް ރޭގަނޑު 10:30 ވަންދެން ހުޅުވާފައި ބަހައްޓާއިގެން ހައްލެއް ލިބިދާނެ ކަމަށް އެ ވިޔަފާރަހިންގާ ފަރާތްތަކުން ނުބުނާ ކަމަށް ނަޝީދު ވިދާޅުވިއެވެ.
އަދި މިހާރު ބޭނުންވަނީ "މުޅިން ދޫކޮށްލަން" ކަމަށް ނަޝީދު ވިދާޅުވިއެވެ.
ކޮވިޑް-19 އާ ގުޅިގެން އަޅާފައިވާ ފިޔަވަޅުތަކަކީ ނާއިންސާފުން އަޅާފައިވާ ފިޔަވަޅުތަކެއް ކަމަށާއި، އެފިޔަވަޅުތަކުގެ ސަބަބުން ހޮޓާ، ކެފޭ އަދި ރެސްޓޯރަންޓު ހިންގާ ފަރާތްތަކަށް ގެއްލުމާ ކުރިމަތިލާން ޖެހިފައިވާ ކަމަށް ބުނެ އެ ފަރާތްތަކުން ވަނީ ކަމާ ބެހޭ ފަރާތްތަކުގެ އެހީއަކަށް އެދިފައެވެ.
އެގޮތުން އެފަރާތްތަކުގެ ކަންބޮޑުވުންތައް ހިއްސާކޮށް، ރައްޔިތުން މަޖިލީހަށް ސިޓީއެއް ހުށަހަޅާފައިވެއެވެ. މި ކަންބޮޑުވުންތަކާއި ގުޅިގެން ރައްޔިތުންގެ މަޖިލީހުގެ އިގްތިސާދީ ކޮމިޓީގެ މާދަމާގެ ބައްދަލުވުމަށް އެޗްޕީއޭ ހާޒިރު ކުރަން ވަނީ ނިންމާފައެވެ.
މި ދަނޑިވަޅުގައި ހޮޓާ، ކެފޭ އަދި ރެސްޓޯރަންޓު ހިންގާ ފަރާތްތަކުން މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމެއްގައި ވަނީ ކޮވިޑް-19 އާ ގުޅިގެން އެ ސިނާއަތަށް ލިބުނު ގެއްލުމުގެ އަދަދު 100 މިލިއަނަށް ވުރެ އިތުރު ވާނެ ކަމަށް ބުނެފައެވެ.
