އެޗްޕީއޭގެ ފިޔަވަޅުތަކާއި ގުޅިގެން ކެފޭ ރެސްޓޯރަންޓުތަކަށް ކުރިމަތިވެފައިވާ މައްސަލަ ހައްލުކޮށްދިނުމަށް އެދި މަޖިލީހުގައި މިއަދު ވާހަކަ ދައްކަވަމުން ބޮންޑޭ ވިދާޅުވީ އެޗްޕީއޭ އިން އަޅާފައިވާ ފިޔަވަޅުތަކާއި ގުޅިގެން އެންމެ ބޮޑު ޝަކުވާއެއް ލިބެމުންދަނީ ހަވީރު 6:00 އިން ފެށިގެން ވެހިކަލް ދުއްވުން މަނާކުރުމުން، ބަހަށް އަރައި ތޮއްޖެހިގެން އެހެން ތަންތަނަށްދާން މަޖުބޫރުކުރުން ކަމަށެވެ.
އެޗްޕީއޭ އިން އަޅާ ފިޔަވަޅުތަކަކީ އާންމު އިންސާނެއްގެ ހަމަ ބުއްދި ގަބޫލުކުރާ ގޮތަށް އަޅާ ފިޔަވަޅުތަކަށް ވާންޖެހޭކަމަށާއި އެކަމަކު ވަރަށް ދޯހަޅި ކަންކަން ކުރަމުން އަންނަ ކަމަށް ބޮންޑޭ ވިދާޅުވި އެވެ. އަދި އެކަމުގައި އެޗްޕީއޭގެ އިސްވެރިންގެ އިހުމާލުވެސް ބޮޑު ކަމަށް ވިދާޅުވި އެވެ.
ބޮންޑޭ ވިދާޅުވީ އެ މައްސަލަތައް ދިމާވެފައި ވަނީ އެޗްޕީއޭގެ ބާރެއް ނެތުމުން ކަމަށެވެ. މިއަދު 12:30 ގައި އިގްތިސޯދީ ކޮމިޓީގައި އޮތް ބައްދަލުވުމަށް އެޗްޕީއޭގެ އިސްވެރިން ހާޒިރުކުރާނެކަން ފާހަގަކުރައްވަމުން ބޮންޑޭ ވިދާޅުވީ މާލީ މަންފާއެއް ހޯދުމަށް ޓެގުން އެޗްޕީއޭ ހިސޯރުކޮށްފައިވާ ކަމަށެވެ. އަދި އެކަމަށް ނިމުމެއް ގެންނަން ޖެހޭ ކަަމަށާއި އެއީ ވަރަށް ސީރިއަސް މައްސަލައެއް ކަމަށް ބޮންޑޭ ވިދާޅުވި އެވެ.
